Сингапурда иккита бир хил Lamborghini Aventador аварияга учради (видео)

Сингапурда деярли бир хил иккита Lamborghini Aventador S суперкарлари ўзаро тўқнашув содир этди. ЙТҲ иштирокчиси бўлган биринчи Aventador’нинг мотор бўлмасида кичик ёнғин юзага келган, деб хабар беради Motor.

Сингапурлик журналистларнинг тахминича, ўзаро тўқнашув содир этган Lamborghini’ларнинг эгалари бир-бирини таниган ва биргаликда ҳаракатланаётган бўлган. Чорраҳада машиналардан бири кескин тормоз бергани сабаб иккинчи суперкар ҳайдовчиси ўз вақтида тўхташга улгурмай қолган.

Авариядан сўнг биринчи навбатда иккала Aventador’нинг ҳам рақамлари ечиб қўйилган. Олд тарафда турган суперкарнинг мотор бўлмаси тутай бошлаган ва унинг эгаси ёнғиннинг олдини олиш учун ўт ўчириш мосламасидан фойдаланишга мажбур бўлган.

Суратларга кўра, машиналарнинг фақатгина аэродинамик обвесига зарар етган: олдиндаги Lamborghini’нинг диффузори ва бамперига, орқадаги машинанинг фаралари, бампери, сплиттер, юкхона қопқоғи ва қанотига шикаст етган.