Метролардаги умумий вентиляция тизими коронавирус инфекцияси тарқалиш хавфини ошириши сабабли уларнинг ҳаракатланишига рухсат берилмади. Бу ҳақда Санитария-эпидемиология назорати давлат инспекцияси бош инспектори Нурмат Отабеков АОКА ҳузуридаги штабда ўтказилган брифинг давомида маълум қилди.
Фото: «Дарё»
Келиб тушган саволлар қаторида «Нима сабабдан автобусларга рухсат берилди-ю, метрога эса йўқ?» саволига Нурмат Отабеков қуйидагича жавоб қайтарди: «Метрога рухсат берилмаганига сабаб — метрода ҳаво тозалаш тизими умумий. Шундай экан, ҳаводаги коронавирус қўзғатувчиси бутун метро ҳаракати йўналишидаги станцияларни барчасига тарқалиши эҳтимоли борлиги нуқтаи назаридан ҳозирча бунга рухсат йўқ».
Шу билан бирга, таъкидланишича, бу масала келгусида яна кўриб чиқилиши мумкин.
Аввалроқ 15 июндан ўзбекистонликларга ўқиши ва ишини давом эттириш учун чет элга авиақатновлар орқали чиқишга рухсат берилгани, мамлакатда «қизил», «сариқ» ва «яшил» тоифадаги ҳудудлар рўйхати янгилангани тўғрисида хабар берилганди.
Мавзуга доир: Ўзбекистонда давлат боғчалари 1 августдан очилади, нодавлат боғчалардаги 15 кишилик чеклов бекор қилинди
Эслатиб ўтамиз, Республика махсус комиссиясининг қарорига мувофиқ, «қизил», «сариқ» ва «яшил» ҳудудларга ажратиш тартиби, шунингдек, кучайтирилган санитария-гигиена назорати 2020 йилнинг 1 августига қадар сақлаб қолинади.
