Ижтимоий тармоқларда Юнусобод туманида ИИО ФМБ ходимлари бир фуқарони мажбурлаб хизмат машинасига ўтқазишга уринаётгани тасвирланган видео тарқалди. Тошкент шаҳар ИИББ ахборот хизматининг маълум қилишича, видеодаги фуқаро ИИО ФМБ чақирувини менсимаганлиги сабабли ходимлар уни ички ишлар органларига етказишга мажбур бўлган.
Видеодан кўриш мумкинки, Чилонзор тумани ИИО ФМБ ходимлари Юнусобод туманида фуқарони ички ишлар органларига етказиш учун хизмат автомобилига ўтқазишга уринган. Фуқаро эса қаршилик кўрсатиб, адвокат таклиф этилишини талаб қилган.
Маълумотларга кўра, 28 май куни Чилонзор тумани ИИО ФМБга И.М. исмли фуқаро мурожаат қилиб, мол сотиб олиш баҳонасида ундан катта миқдорда пул олишгани, пулни ҳам қайтариб бермаган шахсларга нисбатан чора кўрилишини сўраган.
Келиб тушган ариза бўйича текширув ўтказиш мақсадида Юнусобод туманида яшовчи Д.И. исмли шахсга Чилонзор тумани ИИО ФМБга 11 июнь куни етиб келиши ҳақида чақириқнома берилган. Чақириқнома бериш вақтида унга чақирув сабаби ҳам тушунтирилган.
«Д.И. Чилонзор тумани ИИО ФМБнинг чақирувини менсимаганлиги сабабли Чилонзор тумани ИИО ФМБ 1-сон ички ишлар бўлими ходимлари Д.И.нинг турар жойига бориб, уни ички ишлар органларига олиб келишга мажбур бўлишган», — дейилади хабарда.
Ҳозирги вақтда тўпланган маълумотлар дастлабки тергов органларига қонуний чора кўрилиши учун йўналтирилган. Қайд этилишича, Д.И.ни қўлга олиш чоралари кўрилмоқда.
Изоҳ (0)