Қозоғистон соғлиқни сақлаш вазири Елжан Биртановда коронавирус аниқланди. Бу ҳақда вазир ўзининг Facebook’даги саҳифаси орқали маълум қилган.
«Дўстлар, афсуски, сизларга бир ёмон хабарни айтишга мажбурман. Сўнгги марта коронавирусга топширган тестим натижаси ижобий чиқди. Бу белгисиз шакли бўлмагани учун юқумли касалликлар шифохонасига ётдим», — деб ёзари Биртанов.
«Қаттиқ санитария чораларига риоя қилганимга қарамай, хавф доимо бор. Айниқса, бу ишлаётган ва масофадан туриб ишлай олмайдиганларга тегишли. Сўнгги кунларда бир қатор вилоятларда касаллар сони ортаётгани кузатилмоқда, хусусан, тадбиркорлар, корхона ходимлари, тиббиёт ходимлари, давлат хизматчилари, ОАВ вакиллари орасида. Кўплаб фуқароларимиз ҳозирда Қозоғистонда глобал инқироз оқибатлари ва пандемияга боғлиқ муаммоларни ҳал этиш билан шуғулланмоқда. Шу сабабли тез-тез шахсий учрашувлар, жойларга сафарга чиқишга тўғри келмоқда. Бу эса бизни COVID-19 билан касалланиш хавфига янада яқинлаштиради», — дея қайд этади вазир.
Шунингдек, Елжан Биртанов барча қозоғистонликлардан «шахсий карантин»га риоя қилишни сўради. Хусусан, иш жойи, транспорт воситалари ва дўконларда ижтимоий масофаланишга қоидаларига амал қилиш, имкони борича масофадан туриб ишлаш, яқинлар ва дўстлар билан онлайн мулоқот қилиш, жамоат жойларида ниқобда юриш, қўлни камида 20 сония давомида ювиш каби талабларни такрорлаб ўтган.
Эслатиб ўтамиз, бунга қадар Испания бош вазирининг рафиқасида, АҚШдаги республикачи конгрессменда, Бразилия Сенати раисида, Монако князида, Исроил соғлиқни сақлаш вазирида, Россия президенти билан кўришган шифокорда, Россия бош вазири ва президент матбуот котибида, шунингдек, Арманистон бош вазири ва Чеченистон раҳбарида ҳам коронавирус аниқланган эди.
Изоҳ (0)