Рамосдан Азаргача. Жозе Моуриньо билан муроса қилолмаган футболчилар ҳақида

Жозе Моуриньо – бу деярли ҳеч кимни ўз шахсига бефарқ қолдирмайдиган футбол мураббийи. Златан Ибрагимович каби кибрли футболчи Жозе учун ўлишга ҳам тайёрман деса, яна қайсидир футболчиларнинг уни кўришга кўзи йўқ. Ва бунинг асосли сабаблари бор...

Қуйида «футболдаги энг катта ярамас» номини олган Жозе Моуриньо билан муроса қила олмаган футболчилар ҳақида сўз юритилади.

Эден Азар

Аслини олганда, Жозе Моуриньо бельгиялик футболчига ўзини намойиш этиши ва ҳозирги даражасига етишишига яхшигина ёрдам берганди. Португалиялик мутахассис «Челси» мураббийлигига қайтгач, Эден анча самарали ва жамоанинг муҳим ўйинчисига айланганди. Аммо 2014/15 йилги чемпионлик мавсумидан кейин Моуриньо ва Азар ўртасида келишмовчилик юзага келди. Буларнинг барчасига сабаб, Азарнинг жароҳат олиши ва мураббийнинг истагига қарши майдонни тарк этиши бўлганди. 2015 йилнинг декабрь ойида Моуриньо вазифасидан озод этилади ва узун қулоқ гапларга кўра, бу қарорда «Челси»нинг икки футболчиси Сеск Фабрегас ва Эден Азарнинг таъсири кучли бўлган. Тўғри, кейинроқ Азар Моуриньонинг тактикасини тушунганини ва уни яхши мураббий деб ҳисоблашини айтганди, аммо вақтни ортга қайтариб бўлмас экан, бунинг нима фойдаси бор?

Вильям Галлас

Франциялик ҳимоячиси Моуриньога «Челси» таркибида икки марта Англия чемпионатида ғолиб бўлишга ёрдам берган, аммо кейинроқ уларнинг муносабатлари кескинлашиб кетади. Жозе Вильямни чап қанот ҳимоясида ўйнатади, Вильям эса ўзига яхши таниш бўлган ҳимоя марказида тўп суришни хоҳларди. Натижада, Галлас мавсумолди йиғинларида саботаж қилиш орқали ўзини бошқа клубга сотиб юборишларини сўрайди. Ҳатто, Галлас Моуриньога агар қўйиб юбормаса, ўз дарвозасига тўп киритишини айтган экан. Натижада Жозе орқага чекинади, футболчи эса «Арсенал»га йўл олади. Кейинчалик, Вильям Жозени ўзи билан бирга ишлаган энг яхши мураббий деганди. Аммо бу унинг фаолиятини тугаганидан кейин эди. Ким билсин, эҳтимол, у бу сўзларни кўз кўзга тушганида ноқулай аҳволга тушиб қолмаслик учун айтгандир.

Рикардо Куарежма

2008 йилнинг ёзида Куарежма «Барселона»дан «Интер»га кўчиб ўтади, у ерда уни ҳамюрти Жозе Моуриньонинг шахсан ўзи кўришни хоҳлаганди. Аммо футболчи Италияда муваффақиятли ўйин кўрсата олмайди. Ҳатто, мавсум якунида Куарежманинг трансфери энг катта хато бўлгани таъкидланади. Куарежма фаолиятидаги ушбу босқични ёдга олишни хоҳламаслигини ва «Интер»га ўтиш ҳаётидаги энг ёмон қарор бўлганини таъкидлайди. Ўз навбатида, Куарежма Моуриньони ҳам унутмади ва нима сабабдан асосий таркибда унга ишонч билдирмаганини тушуниб ета олмаганини айтган. Чунки Жозенинг ўзи Куарежмани қўярда-қўймай Миланга таклиф этганди.

Люк Шоу

Иқтидорли, аммо жароҳатларга мойил бўлган Люк Шоу Моуриньодан анча олдин «Манчестер Юнайтед»га келганди, аммо португалиялик мутахассис келиши билан унинг «қизил иблислар» сафидаги келажаги шубҳа остида қолди. Жозе Шоуни танқид қилишдан чарчамасди ва буни очиқчасига қиларди. Матбуотда Шоунинг қобилияти «Манчестер Юнайтдед» даражасига мос эмаслиги ҳақида Жозенинг шарҳлари мунтазам пайдо бўла бошлади. Кейинроқ эса Шоунинг «Олд Траффорд»ни яқин орада тарк этиши тўғрисида жуда кўп гапирилди, аммо охир-оқибат «Манчестер Юнайтед» Моуриньонинг ўзига чиқиш эшикларини кўрсатиб қўйди. Люк Шоу эса ҳамон клубда ва асосий таркибга киришга ҳам муваффақ бўлган.

Кевин де Брюйне

2013 йилнинг ёзида Кевин де Брюйне «Вердер»да ижарада ўтказган ажойиб мавсумидан кейин «Челси»га қайтди. Худди шу вақтда Моуриньо ҳам Лондонга қайтганди. У Кевинга асосий таркибдан жой ваъда қилиб, уни жамоада олиб қолади. Де Брюйне ишонди ва қолишга қарор қилди, аммо қайсидир маънода алданганди. Олти ой давомида у Премьер Лигада атиги учта ўйинда майдонга тушади. Моуриньо асосан бошқа ижрочиларга имкон берарди. Вақт ўтиши билан Моур нима сабабдан де Брюйне ўйнамаяпти, деган савол билан кўмиб ташланди, Жозе эса бунга жавобан бельгияликнинг ўйинларга тайёр эмаслигини айтганди. Де Брюйне эса бунга тоқат қила олмади ва ўзини трансферга қўйишларини сўради. «Челси» мухлислари ярасини янгиламаслик учун воқеаларнинг кейинги ривожи, Кевиннинг «Вольфсбург»даги ажойиб фаолияти ва унинг «Манчестер Сити» етакчиларидан бири айлангани ҳақида яхшиси гапирмаган маъқул.

Давид Луис

Бразилиялик марказий ҳимоячи Жозе Моуриньо келгунига қадар «Челси»нинг асосий ўйинчиларидан бири эди. Жозе эса Луисни ўз позициясига нисбатан ҳаддан зиёд ҳужумкор футболчи деб топди. Моуриньога кўпроқ интизомли ва ҳатто маълум даражада фақат ҳимоя билан чекланадиган ҳимоячилар керак эди, шунинг учун Давид Луис асосий ўйинчи ролини йўқотди ва кейинчалик ПСЖга сотиб юборилди. У Моуриньо кетгач, яна Лондонга қайтганди.

Икер Касильяс

«Реал» академиясининг тарбияланувчиси Икер Касильяс Мадридлик мухлислар учун том маънода бут эди, аммо у ва Жозе ўртасидан«қора мушук ўтади». Дастлаб Касильясга Моуриньонинг «Реал» ва »Барселона« қарама-қаршилигида Мадрид клубининг рақобатбардош эмаслиги ҳақида гапиргани ёқмаган бўлса, навбатдаги «Эль-Класико» олдидан матбуотда «Реал» таркиби тарқалиб кетади.

Моур эса бунда телевидениеда ишлайдиган Икернинг қайлиғи Сара Карбонеродан шубҳаланади. Бундан ташқари, дарвозабон каталонияликларнинг баъзи футболчилари хусусан, Хави ва Пуйоль билан яхши муносабатда бўлган. Улар ўзаро суҳбатлашарди, Моуриньо эса майдонда Мадрид ва Барселона ўртасидаги ҳақиқий жангни кўришни хоҳлаган. Икернинг Хави ва Пуйоль билан илиқ муносабатлари Жозе томонидан хиёнат деб баҳоланди. Касильяс захира дарвозабони бўлишдан чарчади ва маълум вақтдан сўнг яна футбол қувончини ҳис этиш учун «Порту»га кетишга мажбур бўлди.

Пепе

Аввалига Моуриньо Пепега бўлган ишончи юқори эди ва унинг ўйин услубидан жудаям мамнун эди. Аммо Жозе ва Икер Касильяс ўртасида можародан кейин ҳимоячи кутилмаганда Икерни қўллаб-қувватлади ҳамда матбуотда Моуриньони очиқчасига танқид қилиб, унинг дарвозабонга нисбатан хатти-ҳаракатларини адолатсиз дея таърифлади. Жозе эса бу сўзларни душманлик сифатида қабул қилди ва ёш Рафаэл Варанга кўпроқ ишонч билдира бошлади. Фақатгина Жозе «Челси»га кетганидан сўнг Пепе ўз ўрнига қайтади.

Серхио Рамос

Ва, албатта, Серхио Рамос...

2013 йилдаги Жозе Моуриньо ва Серхио Рамос ўртасидаги келишмовчиликни ёдга олмаслик мушкул. Ўшанда «қироллик клуби» сардори клуб президенти Флорентино Пересга шарт қўйганди. Танла! – у ёки мен. Шу билан бирга, Серхио унга «Реал»нинг бир қатор асосий ўйинчиларининг ҳам тарк этиши мумкинлигини айтган. Шу боис Жозеда ўз лавозимини сақлаб қолиш имконияти жуда паст эди. Ўшандан бери Рамос Моуриньони эсламасликни афзал кўради. 2019 йилнинг кузида Зиданнинг истеъфоси ва Жозенинг қайтиши ҳақидаги миш-мишлар матбуотда пайдо бўлганида, Рамос биринчилардан бўлиб Зиданнни қўллаб-қувватлаганди. Шубҳасиз, Рамосда яна Жозе билан бирга ишлаш режаси бўлмаса керак.

Педро Леон

Ўн йил аввал Педро Леон исмли умидли вингер бўлган. «Реал» уни «Хетафе»дан 10 миллион еврога харид қилганди. Моуриньо эса ўшанда эндигина Мадрид клубига келганди. Афсуски, Моур ёш йигитчага ўзини кўрсатиш имкониятини бермади. Жозе ҳатто, уни жамоа машғулотларидан четлатгани ва бу билан унинг биринчи жамоа билан ишлашга тайёр эмаслигини айтгани ҳақида миш-мишлар тарқалганди. Педро Испания радиоларидан бирига берган интервьюсида Моуриньо бир вақтлар уни умуман майдонга туширмаслигини ва ҳаттоки, жамоа самолёти қуласа-ю ва фақатгина Леон тирик қолган тақдирда ҳам уни ўйнатмаслигини айтган экан. Жозе гарчи ўзи ҳақидаги салбий фикрларга ўрганиб қолган бўлса ҳам, бу гапларидан со​‘​нг футболчи билан кейинги муносабатлари ҳақида ўйлаганмикан?

Билол Эркин таржимаси

Манба

Бошқа мақолалар: