Оғир вазн тоифасида WBA Super, WBO, IBF ва IBO чемпионлик камарлари соҳиби Энтони Жошуа ва WBC чемпиони Тайсон Фьюри ўзаро жанг ўтказиш борасида келишувга эришди. Бу ҳақда Жошуанинг промоутери Эдди Ҳирн маълум қилди.
«Биз улкан муваффақиятга эришдик. Бироқ олдиндаги кўплаб масалаларни ҳал қилиш зарур. Ҳозирда жанг ўтказиш мумкин бўлган турли жойлар ва саналарни кўриб чиқмоқдамиз. Энтони Жошуа ва Тайсон Фьюри молиявий томонларни келишиб олди.
Иккиси ҳам жанг қилишга рози. Иккита жанг бўлади. Биринчи жанг кейинги йили бўлиб ўтиши мумкин, яъни 2021 йилда», — дейди Эдди Ҳирн.
Жошуа аввалги жангини 2019 йилнинг декабрида Энди Руисга қарши ўтказганди. Саудия Арабистонида бўлиб ўтган реванш жангида британиялик боксчи камарларини қайтариб олганди.
Фьюри эса 2020 йилнинг февралида Деонтей Уайлдерни таслим этган ҳолда Жаҳон чемпионига айланганди.
Изоҳ (0)