Иқтисодиёт ва тинчлик институти дунёнинг 99,7 фоиз аҳолиси истиқомат қиладиган 163 мамлакатни қамраб олган навбатдаги «Тинчликсеварлик глобал индекси»ни (Global Peace Index 2020) эълон қилди.
Ўзбекистон жамиятнинг жипслашуви, инсон ҳуқуқларига риоя этилиши, сиёсий ва иқтисодий барқарорлик, террорчилик таҳдиди, жанговар ҳаракатлардаги иштирок каби омиллар ҳисобга олинадиган мазкур рейтингда 103-ўринни эгаллади. Ўтган йилги рейтингда мамлакат 102-ўринни эгаллаганди.
Марказий Осиё давлатларидан Қозоғистон 70, Қирғизистон 93, Тожикистон 107, Туркманистон 116-ўринда қайд этилди. Мўғулистон 39-поғонадан жой олган. Афғонистон 163 мамлакат орасида сўнгги ўринни эгаллади.
Исландия ушбу рейтингда 2008 йилдан бери эгаллаб келаётган етакчилик ўрнини бу гал ҳам ҳеч кимга бермади. Ундан кейинги ўринлардан Янги Зеландия, Португалия, Австрия ва Дания жой олди.
«Тинчликсеварлик глобал индекси» (GPI) Иқтисодиёт ва тинчлик институти томонидан 14 йилдан бери тузиб келинади. Индекс асосан уч тоифага қурилади: «Чўзилиб кетган низолар», «Муҳофаза ва хавфсизлик» ҳамда «Ҳарбийлашиш». Булар ҳам ўз навбатида 23 индикаторга бўлиниб, мамлакатларнинг ташқи ва ички тинчликсеварлиги баҳоланади.
Индикаторлар, хусусан, жамиятнинг жиноятларга муносабати, ҳар 100 минг аҳолига тўғри келувчи қотилликлар ва маҳкумлар сони, қуролдан фойдаланиш имконияти, ҳар 100 минг аҳолига тўғри келувчи полиция ва хавфсизлик хизмати ходимлари сони, қуролли низолардаги иштироклар ва қурбонлар сони, ҳарбий харажатлар, сиёсий барқарорлик, ички низоларнинг давомийлиги ва ҳоказоларни ўз ичига олади.
Изоҳ (0)