Фарғона вилояти Соғлиқни сақлаш бошқармаси томонидан беғараз ёрдам сифатида юборилган замонавий тиббий жиҳозлар Сўх туманига етказилди. Бу ҳақда туман ҳокимлиги ахборот хизмати хабар қилган.
Шунингдек, Сўх тумани аҳолисига тиббий ёрдам кўрсатиш мақсадида 18 нафар юқори малакали тиббий ходимлар ва профессорлар етиб келган. Малакали тиббий ходимлар таркибига кирувчи жарроҳ, эндокринолог, акушер-гинеколог, терапевт-эндокринолог, кардиолог, педиатрлар туманнинг маҳаллалар кесимида аҳоли билан учрашиб, уларни тиббий кўрикдан ўтказиб, зарурий маслаҳатларини берган.
Вилоят соғлиқни сақлаш бошқармаси бошлиғи Одил Умаровнинг сўзларига кўра, Тиббиёт ходимларининг касбий малакасини ривожлантириш маркази, Андижон давлат тиббиёт институти, Тошкент тиббиёт академияси Фарғона филиали, Тошкент тиббиёт академияси Акушерлик ва гинекология кафедраси, Тошкент педиатрия тиббиёт институти, Тошкент тиббиёт академиясидан жалб этилган юқори малакали мутахассислар сўхликларни секторлар кесимидаги тиббиёт муассасалари ва оилавий поликлиникаларда тиббий кўрикдан ўтказади.
Бошқарма мутасаддиси туманга замонавий тиббиёт асбоб-ускуна ва жиҳозларининг қолган партияси тез муддатда олиб келинишини ҳам билдирган.
Мавзуга доир: Шавкат Мирзиёев: Сўхдаги воқеалар қирғиз халқи билан дўстлигимизга, борди-келдимизга таъсир қилмаслиги керак
Изоҳ (0)