Ўзбекистон аэропортлари халқаро авиақатновларни тиклашга тайёргарлик кўрмоқда

Ўзбекистон аэропортлари меҳмонлар ташрифига қизғин тайёргарликни бошлаб юборган. Бу ҳақда Uzbekistan Airports ахборот хизмати хабар қилган.

20 дан зиёд хорижий авиакомпаниялар, жумладан, Turkish Airlines, Fly Dubai, Korean Air, Asiana, Air Astana, «Аэрофлот», «Сибир» вакиллари ҳамда «Ўзавиация» агентлиги мутасаддилари ўртасида мулоқот бўлиб ўтган.

Музокараларда коронавирус пандемияси ва карантин чекловларининг юмшатилишидан кейин хорижий авиакомпанияларнинг ўзаро парвозларни қайта тиклаши ва бу борадаги ҳамкорликни самарали йўлга қўйиши масалалари ҳақида фикр алмашилган.

Uzbekistan Airports бошқаруви раиси Равшан Исмоилов Ўзбекистон аэропортлари авиаташувларни тиклаш, йўловчиларга сифатли хизмат кўрсатиш ва ҳамкорликда фаолият олиб боришдан манфаатдорлигини қайд этган. Шунингдек, у бу борадаги ҳамкорликнинг сайёҳлик ҳамда экспортнинг ривожланишига, инвестициялар жалб қилиниши кучайишига туртки беришини таъкидлаган.

Uzbekistan Airports матбуот хизмати хорижлик шериклар ҳам Ўзбекистонга парвозларни қайта тиклашга ҳар жиҳатдан тайёр эканлигини маълум қилган.

Эслатиб ўтамиз, 2020 йил 16 март куни Uzbekistan Airways маҳаллий ва халқаро авиақатновларни бекор қилган, кейинчалик бекор қилинган рейслар учун чипталарни топширишда жарималар ва санкциялар бўлмаслигини билдирган. 2 майда Uzbekistan Airways ижроия органига Ўзбекистон ташқи иқтисодий фаолият миллий банкидан олинган 111 миллион АҚШ доллари миқдоридаги кредит тўловини 2020 йилда вақтинча тўхтатиб туриш масаласини кўриб чиқиш топширилган. Қарор ягона аксионер — давлат томонидан 30 апрелда қабул қилингани ҳақида хабар берилган. Карантин чораларини енгиллаштириш доирасида 18 майдан бошлаб Ўзбекистоннинг бир қатор шаҳарларига авиа ва темир йўл қатновлари қайта тикланди.

Ўзбекистон Президенти Шавкат Мирзиёев 2020 йил 25 май куни транспорт соҳасининг барқарор ишлашини таъминлаш ва изчил ривожлантириш масалалари бўйича ўтказган йиғилишида карантиндан энг кўп зарар кўрадиган Uzbekistan Airways ва Uzbekistan Airports акциядорлик жамиятларининг 122 миллион доллар кредитлари тўлов муддатлари узайтирилгани, 60 миллиард сўмлик солиқ имтиёзлари тақдим этилгани, инқирозга қарши курашиш жамғармасидан 50 миллион доллар миқдорида айланма маблағ сифатида фоизсиз ссудалар ажратилгани маълум қилинди. Шунингдек, Ўзбекистондаги 4 та аэропортни давлат-хусусий шерикликка, Uzbekistan Airways’ни хорижий компания бошқарувига бериш режалаштирилгани айтилди.

28 майда Uzbekistan Airways компанияси «Ми-8МТВ-1» русумли иккита вертолётни, «ТВ3-117 ВМ» русумли саккизта ва «ВСУ АИ-9В» русумли учта авиацион двигателни сотувга қўйгани хабар қилинган эди.