Қорақалпоғистон Республикаси Тўрткўл туманида «Трамадол» олиб кетаётган шахслар қўлга олинди. Бу ҳақда «Дарё»га ДХХдаги манбалари хабар берди.
ДХХ Қорақалпоғистон Республикаси бошқармаси ходимларининг ички ишлар идоралари вакиллари билан ҳамкорликда Тўрткўл туманида ўтказган тезкор тадбири давомида Бўстон—Қирққиз йўналиши бўйлаб ҳаракатланиб келаётган Nexia 3 тўхтатилиб, текширилган. Автомашина кўздан кечирилганда унда фуқаролар Б.Б. ва У.С. борлиги, автомобилнинг олд ўриндиғи остида эса сотиш мақсадида олиб кетилаётган 9985 дона «Трамадол» дори воситаси борлиги аниқланган.
Маълум бўлишича, ушбу дори воситалари қозоғистонлик шахслар томонидан Тахтакўпир туманига контрабанда йўли билан олиб ўтилган ва аввалдан келишилган яширин жойга қолдириб кетилган. Кўрилган чора-тадбирлар натижасида чегараолди ҳудуддаги яширин жойдан дори воситаларини олиб, Б.Б. ва У.С.га етказиб берган маҳаллий чўпон Т.В. ҳам ўз яшаш манзилида қўлга олинган.
Ҳозирда мазкур ҳолатлар юзасидан Жиноят кодексининг тегишли моддаларига асосан жиноят ишлари қўзғатилиб, тергов ҳаракатлари олиб борилмоқда.
Эслатиб ўтамиз, Ўзбекистон Вазирлар Маҳкамасининг 2018 йил 27 октябрдаги қарорига мувофиқ «Трамадол» дори воситаси гиёҳвандлик воситалари рўйхатига киритилган.
Изоҳ (0)