Ер ресурслари, геодезия, картография ва давлат кадастри давлат қўмитаси «Учувчисиз учиш қурилмаларидан фойдаланиш самарадорлигини янада ошириш чора-тадбирлари тўғрисида»ги ҳукумат қарори лойиҳасини муҳокамага қўйди.
Ҳужжат лойиҳасига кўра, «Давергеодезкадастр» қўмитаси бир ой муддатда «Геоинновация маркази» ДУК тажриба участкасида мавжуд учувчисиз учиш қурилмаларига техник хизмат кўрсатишни, жорий йил сентябригача уларни йиғишни ва 2020—2022 йиллар мобайнида босқичма-босқич маҳаллийлаштириш чораларини амалга оширади.
Белгиланишича, учиш амалиёти ва ишлаб чиқариш талабларидан келиб чиқиб фуқаролик авиациясининг учувчисиз учиш қурилмаларига белгиланган максимал учиш вазни қишлоқ хўжалиги соҳасида, шу жумладан, қишлоқ хўжалиги экинларини кимёвий моддалар билан қайта ишлаш (сепиш)га мўлжалланган учувчисиз учиш қурилмалари учун татбиқ этилмайди.
Қайд этилишича, кластерлар буюртмалари бўйича 150 метргача бўлган баландликдаги учиш амалиёти учун тўловсиз асосда рухсат берилиши кўзда тутилган.
Қарор лойиҳаси муҳокамаси 24 июнга қадар давом этади.
Аввалроқ 8 апрель куни Президент Шавкат Мирзиёев раҳбарлигида ўтган видеоселекторда томорқалар ҳолатини дронлар орқали мониторинг қилиш ҳамда улардан унумли фойдаланиш учун ҳар бир сектор кесимида зарур чора-тадбирларни амалга ошириш бўйича кўрсатмалар берилганди.
Мавзуга доир: Ўзбекистонда дронлардан фойдаланишга қўйилган тақиқни қайта кўриб чиқиш таклиф қилинди
Изоҳ (0)