Qoraqalpog‘iston Respublikasi To‘rtko‘l tumanida “Tramadol” olib ketayotgan shaxslar qo‘lga olindi. Bu haqda “Daryo”ga DXXdagi manbalari xabar berdi.
DXX Qoraqalpog‘iston Respublikasi boshqarmasi xodimlarining ichki ishlar idoralari vakillari bilan hamkorlikda To‘rtko‘l tumanida o‘tkazgan tezkor tadbiri davomida Bo‘ston—Qirqqiz yo‘nalishi bo‘ylab harakatlanib kelayotgan Nexia 3 to‘xtatilib, tekshirilgan. Avtomashina ko‘zdan kechirilganda unda fuqarolar B.B. va U.S. borligi, avtomobilning old o‘rindig‘i ostida esa sotish maqsadida olib ketilayotgan 9985 dona “Tramadol” dori vositasi borligi aniqlangan.
Ma’lum bo‘lishicha, ushbu dori vositalari qozog‘istonlik shaxslar tomonidan Taxtako‘pir tumaniga kontrabanda yo‘li bilan olib o‘tilgan va avvaldan kelishilgan yashirin joyga qoldirib ketilgan. Ko‘rilgan chora-tadbirlar natijasida chegaraoldi hududdagi yashirin joydan dori vositalarini olib, B.B. va U.S.ga yetkazib bergan mahalliy cho‘pon T.V. ham o‘z yashash manzilida qo‘lga olingan.
Hozirda mazkur holatlar yuzasidan Jinoyat kodeksining tegishli moddalariga asosan jinoyat ishlari qo‘zg‘atilib, tergov harakatlari olib borilmoqda.
Eslatib o‘tamiz, O‘zbekiston Vazirlar Mahkamasining 2018-yil 27-oktabrdagi qaroriga muvofiq “Tramadol” dori vositasi giyohvandlik vositalari ro‘yxatiga kiritilgan.
Izoh (0)