Ўзбекистон қишлоқ хўжалигини ривожлантириш стратегияси доирасида замонавий инновацион Агрохизматлар маркази фаолияти илк бор Фарғона вилоятида йўлга қўйилади. Бу ҳақда Қишлоқ хўжалиги вазирлиги матбуот хизмати хабар берди.
Қайд этилишича, ушбу ҳудудий марказ томонидан ягона дарча тамойили асосида давлат-хусусий шерикчилик шартларида 500 дан ортиқ агросаноат мажмуига оид хизматлар кўрсатилади. Шундан 40 дан ортиқ янги турдаги инновацион технологиялар асосидаги қатор хизматлар, жумладан, геоахборот тизимлари, дрон хизматлари, халқаро стандартлар, Organic, Global G.A.P ва «Ҳалол» сертификатлари жорий этилади.
Шунингдек, марказда 15 та аграр соҳага ихтисослашган илмий-тадқиқот институтларининг олимлари, 30 дан ортиқ маҳаллий ва хорижий агробизнес вакиллари доимий фаолият олиб боради.
Халқаро аккредитациядан ўтган 5 турдаги замонавий лаборатория, яъни қишлоқ хўжалиги маҳсулотлари хавфсизлиги, In vitro кўчатчилиги, тупроқ, сув ва фитосанитария таҳлил лабораторияси вилоятдаги 9 минг фермер хўжаликлари ҳамда 500 дан ортиқ агробизнес вакилларига хизмат кўрсатади.
Марказда 133 нафар ходим учун янги иш жойлари яратилган. Шундан 40 нафар мутахассис бугунги кунга қадар дунёнинг етакчи давлатларида (АҚШ, Туркия, Исроил, Голландия, Германия, Хитой, Латвия давлатлари) малака ошириб қайтди. Қолган мутахассислар ҳам йил якунига қадар халқаро қишлоқ хўжалиги марказларида тажриба ўтайди.
Таъкидланишича, ушбу марказ фаолиятини йўлга қўйишга Жаҳон банкининг кредит лойиҳаси, Европа Иттифоқининг грант кўмаклари ва хусусий инвесторларнинг маблағлари йўналтирилади. Кейинги босқичларда мазкур марказлар фаолияти республикамизнинг бошқа барча ҳудудлари ва туманларида йўлга қўйилиши белгиланган.
Эслатиб ўтамиз, Шавкат Мирзиёев Фарғона вилоятига ташрифлари чоғида ҳар бир ҳудуднинг ери, ресурслари, имкониятларини тўлиқ сафарбар этиш, қишлоқ хўжалиги соҳасида агрохизматлар кўрсатиш тизимини янги босқичга олиб чиқиш бўйича муҳим кўрсатмалар берган эди.
Мавзуга доир:
Изоҳ (0)