Шанхайда хитойлик мутахассислар томонидан COVID-19’ни зарарсизлантирувчи антитаналарга эга JS016 дори воситасини клиник синовлардан ўтказишнинг биринчи фазаси бошланди, деб хабар беради Shanghai Daily.
Shanghai Junshi Biosciences фармацевтика компанияси ҳамда Хитой Фанлар академияси ҳузуридаги Микробиология институти ҳамкорлигида яратилган JS016 номли дори воситаси ўтган дам олиш кунлари Хитой дори воситаларини назорат қилиш давлат бошқармаси томонидан клиник синовлар учун рухсат олган.
7 июнь куни эрталаб дори воситаси Хуашань шифохонасида кўнгилли соғлом инсонлар венасига юборилган. Бу орқали ушбу дори воситасининг хавфсизлиги ва иммуногенлиги, шунингдек, у организмга қандай тушиши ҳамда реципиент танаси ичида ўзини қандай тутиши текширилади.
JS016 коронавирусдан даволанган беморлар қонидаги антитаналар ва замоавий технологиялар, хусусан, алоҳида ҳужайраларни секвенирлаш ва оқим ситометрияси ёрдамида яратилган. Маймунларда ўтказилган дастлабки синовлар JS016 коронавируснинг ҳужайрага киришига тўсқинлик қилишини кўрсатган.
«Дори воситаси юборилганидан сўнг тўрт нафар иштирокчи ўзини яхши ҳис қилган. Биз синовларни ўтказишда режага қатъий риоя қилиш ниятидамиз. Олинган натижалар кейинги клиник синовлар босқичида инфекцияга чалинган одамларга қанча миқдорда дори воситасини юбориш бўйича қарор қабул қилинади», — дейди Хуашань касалхонаси шифокори, профессор Чжан Цзин.
Аввалроқ Хитой коронавирусга қарши вакцинани бутун дунёга тарқатишга ваъда берганди.
Мавзуга доир:
Изоҳ (0)