Россия чегараларини қисман очмоқда, ишга, ўқишга, даволанишга ва қариндошлари ҳолидан хабар олиш учун кетадиганларга мамлакатдан чиқишга рухсат бермоқда. Бу ҳақда Россия бош вазири Михаил Мишустин маълум қилди, деб ёзмоқда «РИА Новости».
Шунингдек, хорижликлар Россияга даволаниш ва яқин қариндошларига қараш учун кириши мумкин бўлади.
Михаил Мишустиннинг маълум қилишича, у ҳукуматнинг тегишли фармойишини имзолаган, бироқ ҳужжат ҳали эълон қилинмаган. Россия чегараларининг қачон очилишига ҳам аниқлик киритилмаган.
Шунингдек, «Росавиация» халқаро авиақатновларни 15 июлдан қисман тиклаш ҳақида «Роспотребнадзор»га таклиф киритишни режалаштирмоқда. Парвозлар дастлаб МДҲ давлатларига йўлга қўйилиши мумкин. Бошқа давлатлар билан эса чегаралар очилишига қараб қатновлар тикланиши мумкин.
Россия ҳукумати коронавирус пандемияси сабабли 27 мартдан бошлаб бошқа давлатлар билан доимий авиақатновларни тўхтатган.
Аввалроқ Россияда COVID-19 билан касалланганлар сони 475 минг нафардан ошгани ҳақида хабар берилган эди.
Эслатиб ўтамиз, Uzbekistan Airways авиакомпанияси яқин икки ҳафта давомида хориждаги ватандошларни Ўзбекистонга олиб келиш учун яна 20 та чартер рейсни амалга оширади. Мазкур рейсларнинг асосий қисми Россия шаҳарларидан ўзбекистонликларни олиб келиши кутилмоқда.
Изоҳ (0)