Россия ва Ўзбекистон ўртасидаги доимий авиақатновлар 15 июлдан тикланиши мумкин

Россия 15 июлдан бошлаб халқаро авиақатновларни қисман тиклашни режалаштирмоқда. Бу ҳақда йирик авиакомпаниялардан биридаги манбага таяниб, «РБК» хабар берди.

Маълум қилинишича, «Росавиация» 15 июлдан халқаро авиақатновларни қисман тиклаш тўғрисида «Роспотребнадзор»га таклиф юборишни режалаштирмоқда.

Таклифга кўра, биринчи босқичда Россия 15 та мамлакатга парвозларни тиклайди. Қайд этилишича, «Росавиация» дастлаб Европа мамлакатлари, шу жумладан, Туркия, шунингдек, Хитой ва Жанубий Корея билан чегараларни очиш ҳақида таклиф беради.

Шунингдек, барча таклифлар коронавирусга қарши кураш бўйича тезкор штаб томонидан муҳокама қилинади ҳамда «Роспотребнадзор» асосий қарорни қабул қилади. Шу билан бирга, таъкидланишича, ушбу давлатлар билан авиақатновни тиклаш тўғрисидаги қарор давлатларнинг Россиядан парвозларни қабул қилишга рози бўлишига ҳам боғлиқ.

«ТАСС»нинг ўз манбасига таяниб маълум қилишича, «Росавиация»нинг таклифлари йирик авиаташувчилар билан бўлган йиғилишда шакллантирилган. Йиғилиш бош вазир Михаил Мишустиннинг халқаро авиқатновларни тиклаш ва соҳани ривожлантириш бўйича топшириғидан кейин бўлиб ўтган.

«Интерфакс» томонидан хабар берилишича, биринчи навбатда ЕОИИ ва МДҲ мамлакатларига авиапарвозлар қайта бошланиши мумкин.

Аввалроқ Россия даволанишга ва яқин қариндошларини парваришлашга борадиган хорижликларга чегараларини очиши ҳамда ишлашга, ўқишга, даволанишга ва яқин қариндошларини парваришлаш учун мамлакатдан чиқиб кетмоқчи бўлган фуқароларга рухсат бериши ҳақида хабар берилганди.

Сўнгги маълумотларга кўра, Россияда коронавирус билан касалланганларнинг умумий сони 476 658 кишига етди, касаллик қурбонлари сони 5971 кишини ташкил қилмоқда. Мамлакатда соғайганлар сони 230 688 нафарга етган.

Эслатиб ўтамиз, Ўзбекистоннинг хорижий давлатлар билан авиақатновларини қайта тиклаш учун эпидемиологик вазиятга боғлиқ равишда «қизил», «сариқ» ва «яшил» рейсларни йўлга қўйиш режалаштирилмоқда. Шунингдек, 8—21 июнь кунлари оралиғида Ўзбекистон хориждаги фуқароларни олиб келиш учун яна 20 та чартер рейс амалга оширади. Уларнинг асосий қисми Россия шаҳарларидан ташкил қилинади.