«Арча-кўча»даги бир кишини ўлдирган пичоқбозлик: можаро дорихонадан тушадиган пулни деб келиб чиққан

Тошкентдаги Кичик ҳалқа йўлининг Шайхонтоҳур туманидан ўтган қисмида 5 июнь, жума куни соат 18:30 атрофида оммавий пичоқбозлик юз бергани, икки киши жароҳатлангани ҳақида хабар берилган эди. Кейинроқ можаро иштирокчиларидан бири олган тан жароҳатлари оқибатида вафот этгани маълум бўлганди.

Ўзбекистон Бош прокуратураси ушбу ҳодиса тафсилотларини «Дарё»га маълум қилди.

Аниқланишича, 27 ёшли Д.М. бизнес ҳамкори — 1988 йилда туғилган Б.Р. билан Тошкентнинг Лутфий кўчасида жойлашган дорихонадан тушадиган даромад сабаб пайдо бўлган келишмовчилик оқибатида жанжаллашиб келган.

Д.М. 5 июнь куни олдиндан Шайхонтоҳур тумани Қизилғунча кўчаси 2-уй қаршисида соат 18:30 га Б.Р. билан кўришув белгилаб, у ерга учта таниши билан бирга, пичоқ билан қуролланиб борган. Б.Р. эса воқеа жойига тўрт киши билан борган — улар орасида 23 ёшли М.Э. ҳам бўлган.

«Жамоат жойида юзага келган тўқнашув давомида Д.М. пичоқ билан М.Э.нинг кўкрак соҳасига бир маротаба уриб, ҳаёти учун хавфли бўлган оғир тан жароҳати етказган», — дейилади расмий ахборотда. Тўқнашув вақтида М.Э. ҳам Д.М.га пичоқ билан жароҳат етказган.

Жабрланувчи М.Э. Учтепа туманида жойлашган шаҳар тез-тиббий ёрдам клиник шифохонасида кўрсатилган тез-тиббий ёрдамга қарамай, олган ўнг кўкрак қафасидаги тешиб кирувчи санчилган-кесилган жароҳати туфайли 5 июнь куни вафот этган.

Ҳолат юзасидан Тошкент прокуратураси 5 июнь куни Жиноят кодексининг 97-моддаси 2-қисми «л» банди (безорилик оқибатида қасддан одам ўлдириш) билан жиноят иши очган. Тергов прокуратуранинг Ўта оғир жиноятларни тергов қилиш бўлими томонидан олиб борилмоқда.

«Гумонланувчи Д.М. кўкрак қафаси чап томонига етказилган санчиб-кесилган жароҳатлар натижасида шифохонага ётқизилиб, тиббий амалиёт ўтказилганлиги сабабли уни терговга жалб қилиш имкони вақтинча мавжуд эмас», — дейилади расмий ахборотда.