Республика махсус комиссиясининг қарорига биноан, 15 июндан бошлаб Ўзбекистондаги «сариқ» ва «яшил» ҳудудларда болалар боғчаларининг фаолиятини қайта тиклашга рухсат этилган. Шунингдек, 5 июндан бошлаб фақат «яшил» ҳудудларда ўқув марказлари фаолиятига рухсат берилган.
Вазирлар Маҳкамаси ҳузуридаги Санитария-эпидемиология назорати давлат инспекцияси бошлиғи Нурмат Отабеков нима учун «сариқ» ҳудудларда гигиена қоидаларига амал қилиши, ижтимоий масофани сақлаши қийин бўлган болаларнинг боғчага боришига рухсат берилгани ва ижтимоий масофани сақлаш, ниқоб тақиш каби гигиена қоидаларини тушунадиган абитуриентлар ўқув марказларида ўқиши мумкин эмаслигига изоҳ берди.
Нурмат Отабеков мазкур ҳолатнинг сабаби сифатида абитуриентларнинг турли ҳудудлардан ташриф буюриши, болалар боғчалари тарбияланувчиларининг эса маълум бир ҳудудда яшашини кўрсатиб ўтди.
Унинг сўзларига кўра. «сариқ» ҳудудларда ўқув марказларининг фаолият юритиш имконияти секинлик билан яратилади. Бироқ бунинг учун вазият касаллик бир абитуриентдан бошқасига ўтмаслигига ишонч ҳосил қилиш имконини бериши керак.
Қайд этилишича, эпидемиологик вазият назорат остида, Республика махсус комиссияси эса вазиятдан келиб чиқиб, тегишли қарор қабул қилади. «Ҳар қандай чекловлар шароитида ва вазиятда ҳам карантин даврида белгилаб қўйилган талабларга риоя қилиш керак», — деди Нурмат Отабеков.
Эслатиб ўтамиз, 15 июндан бошлаб «яшил» ва «сариқ» ҳудудларда мактабгача таълим ташкилотларида машғулотларни 15 кишидан ортиқ бўлмаган гуруҳларда ташкил этишга рухсат этилган. Мактабгача таълим вазирлиги томонидан маълум қилинишича, зарур хавфсизлик чораларини таъминлаб берувчи хусусий МТТлари 2020 йил 15 июндан фаолиятини бошлаши мумкин. Мактабгача таълим вазирлиги барча ҳолатларни инобатга олиб, давлат МТТлари фаолиятини хавфсиз ва сифатли ташкил этишга қаратилган дастур асосида 15 июндан 1 июлгача йўлга қўяди.
Шу билан бирга, 5 июндан бошлаб «яшил» ҳудудларда таълим марказлари, тўгараклар 10 кишидан кўп бўлмаган гуруҳ ташкил этиб, вақтини олдиндан келишган ҳолда фаолият юритишига рухсат берилди. Бунда ходимлар ва болаларнинг соғлиғи ҳолатини доимий назорат қилиш (тана ҳароратини мунтазам ўлчаб бориш), инфекция аломатлари мавжуд бўлган ходимлар ва болаларни машғулотлардан четлатиш, шунингдек, санитария-гигиена ва дезинфекция талабларига қатъий риоя этиш талаб этилади.
Изоҳ (0)