Ўзбекистон Президенти Шавкат Мирзиёев ҳузурида 8 июнь, душанба куни ахборот технологиялари ва рақамли иқтисодиётни ривожлантириш борасидаги ислоҳотлар ижроси бўйича тақдимот ўтказилди. Бу ҳақда Президент матбуот хизмати хабар берди.
Тақдимотда ахборот технологиялари ва рақамли иқтисодиёт соҳаси мутахассисларига шароит яратиш масалаларига ҳам эътибор қаратилди.
2019 йил Тошкент шаҳрининг Мирзо Улуғбек туманида Дастурий маҳсулотлар ва ахборот технологиялари парки бунёд этилган қайд этилди. Андижон ва Марғилон шаҳарларида мазкур IT-паркнинг филиаллари ташкил қилинди. Пойтахтда Муҳаммад ал-Хоразмий номидаги ахборот технологиялари мактаби ҳудудида яна бир филиал биноси қурилмоқда.
2020 йил якунига қадар Гулистон, Бухоро, Наманган, Нукус, Самарқанд, Урганч ва Жиззах шаҳарларида шундай филиаллар ташкил этиш режалаштирилган.
Тақдимотда мутасаддилар мазкур IT-парклар қурилиши, оптик толали линиялар қамрови, мобил интернет тезлиги ва сифатини ошириш ишлари юзасидан ахборот берди.
Эслатиб ўтамиз, Президент аввалроқ ҳам технопарклар қуриш лойиҳаларининг ижросини кўриб чиққанди.
Маълумот учун, 2020 йил 28 апрелда «Рақамли иқтисодиёт ва электрон ҳукуматни кенг жорий этиш чора-тадбирлари тўғрисида»ги Президент қарори қабул қилинди. Ҳужжатга мувофиқ, Ахборот технологиялари ва коммуникацияларини ривожлантириш вазирлигида рақамли иқтисодиёт билан шуғулланадиган яхлит тизим яратилди. Жумладан, «Электрон ҳукумат», иқтисодиёт тармоқлари ва қишлоқ хўжалигини рақамлаштириш, IT-паркларни ташкил этиш ва бошқариш каби вазифалар тўлиқ вазирлик ваколатига ўтди.
Изоҳ (0)