Ўзбекистон ҳудудларида рақамли технологиялар бўйича камида 100 та ўқув маркази очилади. Бу ҳақда Президент Шавкат Мирзиёев ҳузурида 8 июнь, душанба куни ахборот технологиялари ва рақамли иқтисодиётни ривожлантириш борасидаги ислоҳотлар ижроси бўйича ўтказилган тақдимотда маълум қилинди.
Тақдимотда IT инфратузилмасини яхшилаш, аҳоли, айниқса, ёшларнинг бу борадаги саводхонлигини ошириш давр талаби эканлиги таъкидланди.
Ахборот технологиялари ва коммуникацияларини ривожлантириш вазирлигига барча ҳудудларда рақамли технологиялар бўйича камида 100 та ўқув маркази очиш вазифаси қўйилди. Бу даргоҳларда дастурлаш асослари, электрон савдо ва графикли дизайн каби йўналишлар бўйича қисқа муддатли ўқув курслари ташкил этилади.
Мавзуга доир: Ўзбекистон мактабларида 5-синфдан бошлаб ўқитилаётган «Информатика» фани такомиллаштирилади
Эслатиб ўтамиз, давлат раҳбари ташаббуси билан 2020 йил — Илм, маърифат ва рақамли иқтисодиётни ривожлантириш йили деб эълон қилинганди. Президент Олий Мажлисга шу йил январдаги мурожаатномасида рақамли иқтисодиётга фаол ўтиш келгуси 5 йилдаги энг устувор вазифалардан бири сифатида белгиланган эди. Шу асосда, Ўзбекистон мактабларида 7-синфдан бошлаб дастурлаш асосларини ўқитишни йўлга қўйиш режалаштирилмоқда.
Изоҳ (0)