Ўзбекистон Президенти Шавкат Мирзиёев ҳузурида 8 июнь, душанба куни ахборот технологиялари ва рақамли иқтисодиётни ривожлантириш борасидаги ислоҳотлар ижроси бўйича тақдимот ўтказилди. Бу ҳақда Президент матбуот хизмати хабар берди.
Йиғилишда қайд этилишича, бугунги кунда рақамли иқтисодиёт, «Электрон ҳукумат» хизматларига талаб кундан кунга ошиб бормоқда. Лекин ҳозирда 780 турдаги давлат хизматининг 185 тасидан «электрон портал» орқали фойдаланиш имкони мавжуд. Аксарият ташкилотларда иш жараёнини рақамлаштириш фақат ҳужжат алмашинувини электронлаштириш билан чекланиб қолмоқда.
Шу боис «Электрон ўқитиш дастури» орқали ўқиб, диплом олган дастурчиларни давлат ва хўжалик муассасаларига IT мутахассис сифатида ишга олиш зарурлиги таъкидланди. Улар ташкилотларнинг барча фаолиятини анъанавий электрон форматдан рақамли кўринишга ўтказишга масъул бўлади.
Таъкидланишича, бугунги кунда камбағал оилаларга кредит ва субсидиялар бериш масаласини махсус электрон дастур аниқ мезонлар асосида автоматик равишда белгилаши керак.
Бош вазир маслаҳатчисига халқаро экспертларни жалб қилган ҳолда ташкилотларда рухсат бериш ва қарор қабул қилиш жараёнларини электрон форматга ўтказиш бўйича концепция ишлаб чиқиш топширилди.
Маълумот учун, 2020 йилда Ўзбекистонда оптик толали алоқа қамровини мактабгача таълим тизимида 41 фоиздан 100 фоизга, халқ таълимида 40 фоиздан 70 фоизга, соғлиқни сақлаш соҳасида 38 фоиздан 100 фоизга етказиш режалаштирилган.
Изоҳ (0)