Афғонистонда коронавирусга чалинганлар сони 20 минг кишидан, Тожикистонда эса 4,5 минг кишидан ошди

Қозоғистонда ўтган бир сутка ичида яна 165 кишида коронавирус аниқланди, деб хабар беради Tengrinews.

Мамлакат бўйлаб касаллар сонининг ортиши 1,3 фоизни ташкил этмоқда. Коронавирусга чалиниш бўйича янги ҳолатлар қуйидаги ҳудудларда аниқланган:

• Олмаота шаҳри — 32 (1,1 фоиз);
• Нур-Султон шаҳри — 24 (1 фоиз);
• Қарағанда вилояти — 18 (1,6 фоиз);
• Олмаота вилояти — 15 (3,5 фоиз);
• Чимкент шаҳри — 14 (1,5 фоиз);
• Ғарбий Қозоғистон вилояти — 13 (1,6 фоиз);
• Атирау вилояти — 11 (0,9 фоиз);
• Павлодар вилояти — 11 (4,3 фоиз);
• Жамбил вилояти — 7 (1,7 фоиз);
• Шарқий Қозоғистон вилояти — 5 (2,7 фоиз);
• Туркистон вилояти — 5 (1,3 фоиз);
• Қизилўрда вилояти — 4 (0,9 фоиз);
• Манғистов вилояти — 3 (0,9 фоиз);
• Костанай вилояти — 2 (1 фоиз);
• Ақмўла вилояти — 1 (0,6 фоиз).

Бутун мамлакат бўйлаб коронавирусга чалинганлар сони 12 859 кишига етган. Ҳозирга қадар 7376 киши соғайган, 56 киши вирус қурбонига айланган. Шунингдек, 1357 киши коронавирусни белгисиз ташувчи сифатида қайд этилган.Қирғизистонда 8 июнь ҳолатига кўра, яна 25 кишида коронавирус инфекцияси аниқланди. Бу ҳақда мамлакат Соғлиқни сақлаш вазирлигига таяниб, Kloop хабар берди.

Коронавирусга чалинган янги касалларнинг 18 нафари Бишкек шаҳрида аниқланган бўлса, қолган 7 нафари Чуй вилояти ҳисобига тўғри келмоқда.

Бутун мамлакат бўйлаб COVID-19 билан касалланганлар сони 2032 кишига етди, уларнинг 23 нафари вирус қурбонига айланган. Ҳозирга қадар 1445 нафар бемор даволанишга муваффақ бўлган.

Афғонистонда 7 июнь ҳолатига кўра, яна 791 кишида коронавирус аниқланди, деб хабар беради Tolo News.

Мамлакат Соғлиқни сақлаш вазирлигининг маълумотларига кўра, Афғонистонда коронавирусга чалинганлар сони 20 342 кишини ташкил этмоқда.

Бутун мамлакат бўйлаб коронавирус оқибатида вафот этганларнинг жами сони 357 кишига етди, ҳозирга қадар 1875 бемор даволанишга муваффақ бўлди. Таъкидланишича, бугунги кунгача коронавирусга 47 мингдан ортиқ тест ўтказилган.

Коронавирус тарқалишини реал вақтда кузатиб бораётган Жонс Ҳопкинс университети маълумотларига кўра, Тожикистонда коронавирус билан касалланганлар сони 4529 кишига етган.

Мамлакатда ҳозирга қадар 48 киши COVID-19 қурбонига айланган, 2673 бемор даволанишга муваффақ бўлган.

Ўзбекистонда 8 июнь соат 10:00 ҳолатига кўра коронавирусга чалинганлар сони 4352 нафарга етди. Мамлакатда шу вақтгача коронавирусга чалинган беморларнинг 3354 нафари бутунлай соғайган, 17 нафари эса касаллик асоратлари оқибатида вафот этган.