Жанубий Африка Республикаси (ЖАР) ҳукумати хорижлик туристларнинг мамлакатга киришига 2021 йилдан рухсат беришни режалаштирмоқда. Бу ҳақда Тravel анд Leisure хабар қилди.
Мамлакатда коронавирус сабаб белгиланган чекловлар босқичма-босқич равишда бекор қилинаётганига қарамай туризм соҳасини тиклашга бир неча ой вақт талаб қилинади. Ўтган ҳафтадан ЖАРда корхоналар, дўконлар ва мактаблар очила бошлаган. Лекин шунга қарамай жамоат жойларида тиббий ниқоб тақиб юришнинг мажбурийлиги, шунингдек, кўчада фақат 6:00 дан 18:00 гача юриш тартиби ҳам амалда сақланиб қолинган.
Саёҳатчилар қўриқхоналарга ташриф буюриши мумкин, аммо ички туризм миқёсида саёҳат қилишга ҳам йил охиригача рухсат берилмайди.
Тахминларга кўра, ЖАРда мамлакат фуқароларининг дам олиш курортларида ҳордиқ чиқаришига декабрь ойида рухсат тегиши мумкин. Халқаро туризм мавсуми эса келаси йил февраль ойидан очилиши режалаштирилмоқда.
«Биз доимий мижозларга эгамиз ва 2021- ҳамда 2022 йиллар учун турпакетларни мақбул нархларда тақдим эта оламиз. Улар йўлланмаларни ҳам харид қилишидан умидвормиз», — дейди туркомпания асосчиси Таня Котце.
Жонс Ҳопкинс университети эълон қилган статистик маълумотларга кўра, Жанубий Африкада 37 минг 500 дан зиёд одам коронавирусга чалинган, 790 нафар бемор COVID-19 асоратлари оқибатида ҳаётдан кўз юмган.
2020 йил 21 апрелда Африка қитъасида коронавирусга чалинганлар сони 22,5 минг нафардан кўпроқ экани, кейинчалик орадан бир ой ўтиб, 21 майда коронавирус юқтириб олганларнинг умумий сони 3 бараварга ортиб 95 минг кишидан ошгани ва 100 мингга яқинлашгани хабар қилинган.
Изоҳ (0)