Францияда тиббий ниқоблар ва сигарет қолдиқларини кўчага ташлаганларга жарима миқдори 135 еврогача оширилади

Франция ҳукумати кўчаларда тиббиёт ниқоблари, қўлқоплар ва сигарета қолдиқларини ташлаб кетаётган фуқаролар учун белгиланган жаримани 135 еврогача оширишни режалаштирмоқда. Бу ҳақда Франция экология вазири қошидаги давлат котиби Брюн Пуарсон маълум қилган, деб ёзмоқда The Local France.

Ҳукумат ушбу жарима кўзда тутилган фармон лойиҳасини июнь ўрталарида тақдим қилмоқчи. Полиция ҳисоботини тузиш ва уни судга йўналтириш вақтида жарима 750 еврогача ошиши мумкин. Айни вақтда ушбу қоидабузарлик учун 68 евро жарима тайинланмоқда.

Вазирлик ушбу чоранинг 2018 йилда мамлакатда ижроси бошлаган иқтисодиёт ресурсларини тежашни қайта бошлаш бўйича «йўл-харитаси»да қайд этилганини билдирган.

«Ушбу мавзу коронавирус пандемияси сабаб янада долзарблашди, чунки кўчаларда шахсий ҳимоя воситаларини отиш, улоқтириб кетиш ҳолатлари кўпайган», – дейилган вазирлик баёнотида.

Экологларнинг сўзларига кўра, ўзини яккалаш тартиби юмшатила бошлагач, Францияда кўчалар, майдонлар, хиёбонлар ва бошқа жамоат жойларига тиббиёт ниқобларини ташлаб кетиш, қўлқопларни улоқтириш ҳолатлари кўп учрамоқда.

«Ҳар бир инсон ерга ташланган ҳар қандай чиқинди кўп ҳолатларда океанга учиб тушиши мумкинлигини тушуниши лозим. Денгизлар ва океанлар тоза бўлишини истасак, ишни покиза тротуарлардан бошлашимиз лозим», – деган Пуарсон.

Март ойи ўрталарида Францияда пандемия туфайли карантин режими эълон қилинган ва у икки ой давом этганди. Ушбу оралиқда мамлакат бўйлаб кийим-кечак дўконлари, ресторанлар ва меҳмонхоналар ёпилган. 11 майдан республика ҳукумати фавқулодда санитар ҳолат бўйича қонун асосида чекловларни босқичма-босқич юмшата бошлади ва ушбу чора-тадбирлар 10 июлгача давом этади.