Хитой COVID-19 билан касалланган бир нафар беморни даволаш учун 3,2 мингдан 140 минг долларгача маблағ сарфламоқда

Хитойда COVID-19 коронавирус инфекцияси билан касалланган бир нафар беморни даволашга ХХР бюджетидан 3,2 минг АҚШ доллари миқдорида маблағ сарфланмоқда. Айрим ҳолатларда оғир касалланганларни даволаш учун 140 минг долларгача пул ишлатилмоқда. Бу ҳақда «ТАСС» хабар берган.

Сўнгги маълумотларга кўра Хитойда коронавирус инфекцияси тарқала бошлаганидан буён 84 минг нафар одам коронавирусга чалинган, шу вақтгача 4,6 минг киши касаллик оқибатида вафот этган.

«31 майда берилган маълумотлар бўйича тахминан 58 минг нафар беморни даволаш учун тиббий суғурта маблағлари сарф қилинган. Умумий сарф-харажатлар 1,35 миллиард юанни (190,6 миллион доллар) ёки бир киши учун 23 минг юанни (3,2 минг АҚШ доллари) ташкил қилган»,— дейилади ХХР давлат кенгашининг «COVID-19’га қарши кураш: Хитойда амалга оширилган чора-тадбирлар» Оқ китобида.

Ўртача ҳисоблаганда оғир аҳволдаги беморни даволашга тахминан 21,2 минг доллар сарфланган. Пандемияга қарши курашишга мамлакат бюджетидан 22,9 миллиард АҚШ доллари ажратилган.Эслатиб ўтамиз, коронавирус инфекцияси билан боғлиқ дастлабки ҳолатлар Хитойда 2019 йилнинг декабрь ойи охирида қайд этилган. Касалликнинг мамлакат миқёсида тарқалишининг чўққиси 2020 йил февраль ойига тўғри келади. Июнь ойи бошида вируснинг энг биринчи ўчоғи бўлган Ухань шаҳридаги охирги бемор ҳам касалликдан тузалди. Охирги икки ҳафта давомида мамлакат бўйлаб касалланиш ҳолатлари жуда кам қайд этилмоқда. Бутун Хитой ҳудуди паст эпидемиологик хавф зонасига айланган.Апрель ойида Соғлиқни сақлаш вазири Алишер Шодмонов Ўзбекистонда коронавирус инфекциясига чалиниб даволанаётган ўрта аҳволдаги ҳар бир бемор учун 32 миллион сўмдан маблағ сарф қилинаётгани, жонлантириш бўлимида ётган оғир аҳволдаги ҳар бир беморга ўртача 64 миллион сўмдан маблағ ишлатилаётганини маълум қилган. Шунингдек, вазир карантинда бўлиб турган фуқароларнинг ҳар бирига 14 кунлик карантин даври учун 2,4 миллион сўмдан, коронавирусдан тузалиб, реабилитацияга олинган ҳар бир бемор тикланиши учун 2,8 миллион сўмдан сарфланаётганини айтган.

Шу билан бирга, Ўзбекистонда коронавирусга қарши курашда иштирок этадиган шифокорлар ва бошқа ходимлар ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган. Унга кўра, врач ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўмдан тўланади.