Тошкентда 7 июнь куни коронавирус инфекциясини юқтириб олганлик билан боғлиқ 195 та ҳолат аниқланди. Соғлиқни сақлаш вазирлиги маълумотлари шундан далолат бермоқда. Бу шу куни Ўзбекистон бўйича аниқланган касалланиш ҳолатларининг (237 та) 82 фоизини ташкил этди.

Соғлиқни сақлаш вазирлиги 7 июнь куни соат 10:00 да Тошкентда коронавирусга чалинганлар билан мулоқотда бўлган 87 кишида, соат 18:00 да эса 98 кишида касаллик тасдиқланганини маълум қилди. Вазирликнинг соат 23:00 даги ахборотида Тошкентда аҳоли орасида яна 10 кишида коронавирус чиққани билдирилди.

Таъкидлаш жоиз, шу вақтгача бутун Ўзбекистон бўйича бир кунлик касалланиш ҳолатлари сони бўйича энг юқори кўрсаткич 14 апрель куни қайд этилган, ўшанда 167 кишида коронавирус аниқланган эди. Пойтахтда касалланганлар сони кескин ўсиши сабаблари юзасидан ҳозирча бирор расмий изоҳ берилганича йўқ.

Тошкентда 7 июнь соат 23:00 ҳолатига кўра, коронавирусга чалинган жами 2219 нафар бемор рўйхатга олинган (уларнинг бир қисми Сирдарё ва Тошкент вилоятларида аниқланиб, пойтахтга ўтказилган беморлардир). Ҳозиргача улардан 1468 нафари (ёки 66 фоизи) бутунлай соғайган, 728 нафари эса даволанишни давом эттирмоқда; 9 бемор вафот этган.

Тошкент «қизил» ҳудудга айланадими?

Карантин тартибини енгиллаштириш тадбирлари доирасида Ўзбекистон ҳудудлари 8 майдан эътиборан «яшил», «сариқ» ва «қизил» тоифаларга ажратиб чиқилган, Тошкент шаҳри «сариқ» тоифадаги ҳудудлар қаторидан ўрин олган эди. Сўнгги ярим ой ичида «яшил» ва «сариқ» тоифалардаги ҳудудларда карантин тартиби янада юмшатилди.

Хусусан, «сариқ» тоифадаги ҳудудларда шахсий автотранспортда соат 6:00 дан 22:00 гача махсус стикерсиз ҳаракатланишга, такси, парк ва истироҳат боғлари фаолияти ва бошқаларга рухсат берилган эди. Эътиборли томони, Тошкент шаҳрида 8 июндан жамоат транспорти ҳаракати ҳам (қисман, метрополитенсиз) тикланиши кутилмоқда.

Айнан карантин талаблари юмшатилиши билан бир вақтда Тошкент шаҳрида коронавирус инфекциясини юқтириб олиш билан боғлиқ ҳолатлар сони сезиларли кўпайди, шаҳарда касалликнинг бир неча яққол ўчоқлари («Ўрикзор» бозори, Қоратошдаги Mediapark) пайдо бўлди. Маълумот учун, 1 июнь куни Тошкент шаҳрида 23 та, 2 июнь куни 7 та, 3 июнь куни 2 та, 4 июнь куни 9 та, 5 июнь куни 16 та ва 6 июнь куни 10 та ҳолат аниқланган.

Ҳудудларни эпидемиологик вазиятдан келиб чиқиб турли тоифаларга бўлиш амалиёти йўлга қўйилган вақтда доимий равишда коронавирус инфекциясига чалиниш ҳолатлари аниқланган ҳудудлар «сариқ» тоифадан «қизил»га ўтказилиши таъкидланган эди. Айнан шу қоидадан келиб чиқиб, масалан, Навоий вилоятининг Зарафшон шаҳри, Бухоронинг Шофиркон, Наманганнинг Тўрақўрғон туманлари «қизил» ҳудудга айланди.

Тошкент шаҳрида 23 майдан буён аҳоли орасида ҳам, касалланган шахслар билан мулоқотда бўлганлар орасида ҳам мунтазам равишда коронавирус инфекциясини юқтириб олганлар аниқланмоқда, бироқ шаҳарнинг эпидемиологик тоифаси ҳозирча ўзгаргани йўқ. Президент раислигида 26 май куни бўлиб ўтган видеоселектор йиғилишидан сўнг Тошкент «қизил» ҳудудга айланиши мумкинлиги таъкидланган эди, амалда бундай бўлмади.

Эпидемиологик вазият сезиларли оғирлашганига қарамай, Тошкент шаҳрининг эпидемиологик тоифаси ўзгартирилмаётгани юзасидан ҳозиргача бирор расмий тушунтириш берилганича йўқ. Республика махсус комиссиясининг ҳудудларни «яшил», «сариқ» ва «қизил» тоифаларга ажратиб чиқиш ҳақидаги қарорида пойтахт учун бирор истисно назарда тутилганми ёки йўқ — номаълум.