Халқаро пресс-клубнинг Фарғона вилоятига бағишланган сессиясида бандлик ва меҳнат муносабатлари вазири Нозим Ҳусанов Ўзбекистондаги ишсизлик даражаси ҳақида берилган саволга жавоб қайтарди.
«Пандемия барча давлатларга ўзининг салбий таъсирини кўрсатди. Ўзбекистонда ҳам пандемиядан олдин ишсизлар сони ўртача 1 миллион 350 минг нафарга яқин эди, пандемия бошлангач қатор корхоналар фаолияти тўхтатилди ва ишсизлар сони қарийб 2 миллионга яқинлашди», — деган Нозим Ҳусанов.
Шунингдек, меҳнат вазири муҳожирларга тегишли статистик маълумотларни ҳам ошкор қилган. Унинг сўзларига кўра, айни пайтда Ўзбекистонда 550 мингга яқин фуқаро чегаралар ёпилгани туфайли бошқа давлатларга ишлаш учун чиқиб кета олмаган. Вазир бир неча йиллар давомида хориж давлатларида ишлаб келган, ҳунар ва касбга эга одамларнинг бандлигини таъминлаш устувор вазифалардан эканини қайд этган.
Мавзуга доир: Bloomberg: Ўзбекистон меҳнат муҳожирларидан келадиган даромаднинг қарийб ярмини йўқотди
«Шунингдек, Тошкент шаҳри вилоятлар билан ҳам боғланган. Масалан, ўтган ойда Сергели туманидаги қурилаётган биноларга 1,5 мингга яқин меҳнат муҳожирларини қонуний тарзда ишга олдик. Улар ҳозир 1,5 миллон сўмдан 4,5 миллионгача ойлик маош оляпти», — дея қўшимча қилган Нозим Ҳусанов.
Изоҳ (0)