Республика махсус комиссияси қарорига мувофиқ, 8 июнь, душанба кунидан эътиборан Наманган вилоятидаги «яшил» ҳудудларда ҳам масжидлар ўз фаолиятини бошлайди. Бу ҳақда «Дарё» мухбири Азизбек Абдувалиев хабар бермоқда.
Вилоятдаги «яшил» ҳудудлар ҳисобланган Мингбулоқ, Янгиқўрғон, Косонсой, Поп, Наманган, Чортоқ, Чуст ва Учқўрғон туманларида жами 119 та масжид фаолияти тикланади. Наманган шаҳри, Тўрақўрғон, Уйчи туманлари «қизил», Норин тумани эса «сариқ» ҳудуд тоифасида бўлганлиги сабабли бу ерлардаги масжидлар очилишига ҳозирча рухсат берилгани йўқ.
Намангандаги масжидлар дезинфекцияловчи қурилмалар билан таъминланди. Намозхонлар ушбу қурилмадан ўтганидан сўнг ҳарорати ўлчанади. Ҳарорати 37 даражадан юқори бўлган ва тиббий ниқоб тақмаган шахслар масжидга қўйилмайди. Бу талабларнинг бажарилиши тиббиёт ва СЭОМ ходимлари томонидан назорат қилинади.
Масжидларга кириш ва чиқиш жойларида одамлар тўпланиши, савдо-сотиқ билан шуғулланиш, ҳадя ва совғалар тарқатилиши ман этилади. Намозлар ижтимоий масофаланиш сақланган, фуқаролар орасидаги масофа 1,5-2 метр этиб белгиланган ҳолда адо этилишига рухсат берилади.
Янгиқўрғон туманида 7 июнь, якшанба куни бўлиб ўтган тадбирда имом-хатибларга ушбу тартиблар ҳақида батафсил тушунча берилди. Уларнинг бажарилмаслиги масжидларнинг вақтинчалик ёпиб қўйилишига сабаб бўлиши тушунтирилди.
«Масжидларимиз яна намозхонлар учун очилаётгани жуда катта неъмат. Ибодатларимиздаги дуолар сабаб мамлакатдан вирус балоси чекинса ажаб эмас», — дейди вилоят бош имом-хатиби Абдулҳай Турсунов.
Мавзуга доир:
Изоҳ (0)