Хитойда сўнгги суткада коронавирус билан касалланиш бўйича 5 та ва касаллик белгисиз ўтаётган 3 та ҳолат қайд этилди. Беморларнинг 8 нафари соғайди, вафот этиш ҳолатлари қайд этилмади, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Қайд этилишича, янги касалланиш ҳолатларининг барчаси четдан юқтирилган.
Мамлакатда умумий ҳисобда 83 027 киши коронавирусга чалинган. Беморларнинг 78 327 нафари соғайган, 4 634 нафари вафот этган. Касалхоналарда 66 нафар бемор қолмоқда.
Шунингдек, сутка давомида 3 киши инфекцияни белгисиз ташувчи сифатида қайд этилган. Шундай кишиларнинг яна 297 нафари шифокорлар назоратида бўлиб турибди.
Жанубий Кореяда эса сутка давомида 39 киши коронавирусга чалингани қайд этилиб, касалланганларнинг умумий сони 11 668 нафарга етди, деб хабар бермоқда «РИА Новости» мамлакат Соғлиқни сақлаш вазирлиги ҳузуридаги Касалликлар назорати ва профилактикаси маркази (KCDC) маълумотларига таяниб.
Май ойидан буён касалликнинг янги ўчоқлари беморлар сонининг ошишига олиб келмоқда. 28 майда кунлик касалланишлар сони 79 кишига етганди, сўнгги ҳафтада эса бу кўрсаткич 30-50 киши атрофида бўлиб турибди.
Сўнгги суткада 7 киши коронавирусдан соғайиб чиқиб, тузалганларнинг умумий сони 10 506 нафарга етди. Касалликдан вафот этганлар сони ўзгармаган — 273 кишини ташкил қилмоқда.
Хабарда айтилишича, Жанубий Кореянинг айрим аҳолиси узоқ вақт давомида ўзини яккалаш ва ижтимоий масофаланиш режими оқибатида депрессияга тушишни бошлади. Ҳукумат COVID-19 оқибатида қийинчиликка дуч келганларга психологик ёрдам кўрсатиш учун январь ойидаёқ ишонч телефонини йўлга қўйган.
Изоҳ (0)