АҚШда полициячилар томонидан қийноққа солинган ва шифохонада вафот этган Жорж Флойднинг ўлимида полициянинг айбдорлиги ҳақида Change.org платформасига жойлаштирилган петиция рекорд даражада овоз тўплади. 4 июнь ҳолатига кўра петиция 15 миллиондан ортиқ имзо тўплаган.
Петиция янги рекордни 30 майдаёқ ўрнатган (5,8 миллион имзо) ва ҳозирги вақтда ўзига тегишли натижани яхшилаб бормоқда.
Петиция 27 май куни Орегона штатида яшовчи 15 ёшли Келлен исми қиз томонидан тармоққа жойлаштирилган.
«Биз Миннеаполис мери Жейкоб Фрей ҳамда округ прокурори Майк Фрименнинг эътиборини жалб қилиб, ушбу ўта жирканч вазиятга аралашган офицерларни ишдан ҳайдаш ва уларга нисбатан дарҳол айблов эълон қилиниши тарафдоримиз», – дейилган петицияда.
Эслатиб ўтамиз, Флойднинг ўлимидан кейин 4 нафар полициячи ишдан ҳайдалган ва уларга нисбатан айблов эълон қилинганди.
Собиқ полициячи Дерек Шовин иккинчи даражадаги қотилликни содир этганликда, унинг ҳамкасблари Жей-Александр Кюин, Томас Лейн ва Ту Тао эса жиноятга шериклик ва иккинчи даражали қасддан содир этилмаган қотилликка ундашда айбланмоқда. Улар 40 йил муддатга қамалиши мумкин.
Флойднинг вафотидан кейин АҚШда норозилик намойишлари бошланган, оқибатда мамлакатнинг турли шаҳарларида тартибсизликлар, вандализм ва зўравонлик ҳаракатлари содир этилган.
Изоҳ (0)