Украина президенти Владимир Зеленский карантин чекловларини бузгани учун 17 минг гривен (635 доллар) миқдорида жаримага тортилиши мумкин. Бу ҳақда Украина ички ишлар вазири ўринбосари Антон Герашенкога таяниб, «РБК» хабар берди.
Қайд этилишича, президентнинг жарима тўлашига сабаб сифатида кўрсатилаётган воқеа 3 июнь куни Хмельницкий шаҳрида юз берган, Украина президенти мазкур шаҳарга ташриф билан борган. Шаҳар маркази бўйлаб бошқа мансабдорлар билан айланиш чоғида Зеленский кафега кирган ва қаҳва ичган. Шундан сўнг унинг Twitter’даги саҳифасида хабар пайдо бўлган. «Хмельницкийда ажойиб қаҳва! Хушбўй ва мазали! Биринчи кафе карантиндан чиқмоқда, коронавирус эпидемиясидан кейин секинлик билан тикланяпмиз», — деб ёзган Зеленский.
Зеленский қаҳвани кафенинг ичида ичган. Бироқ Украинада умумий овқатланиш муассасалари фаолияти ҳалигача расман тақиқланган. Олиб кетиш учун овқат тайёрлайдиган ва очиқ айвонларда ишлайдиган муассасалар бундан мустасно. Кафе ва ресторанлар фақат 5 июндан бошлаб тўлиқ иш фаолиятини тиклаши мумкин.
Герашенконинг маълум қилишича, президент карантин чораларини бузгани учун жарима тўлаши мумкин. Шу билан бирга, унинг қайд этишича, давлат раҳбарининг айби ҳали исботланмаган. Унинг эслатишича, ИИВнинг Зеленскийни жаримага тортиши биринчи марта эмас. Владимир Зеленский 2019 йил апрель ойида сайлов бюллетенини кўрсатган ва овоз бериш сирини ошкор қилгани учун жаримага тортилган. Шу сабабли полициянинг ваколатли органлари айни пайтда мазкур масалани кўриб чиқмоқда.
Зеленскийнинг ўзи Хмельницкийда журналистлар билан бўлиб ўтган учрашувда у қаҳвага таклиф этилганини ва керак бўлса, жарима тўлашга тайёр эканлигини маълум қилган. «Агар бирор нарсани бузган бўлсам, жарима тўлашга тайёрман. Мени таклиф қилишди, мен кирдим, у ерда ҳаммасини текширдик. Шунчаки жамоага ишондим», — деди Зеленский.
Украинанинг бош санитар шифокори ва соғлиқни сақлаш вазири ўринбосари Виктор Ляшко кафега ташриф вақтида Зеленский билан бирга бўлган. Воқеага изоҳ берган Ляшко муассасага ташрифни текширув сифатида қабул қилиш кераклигини айтган. «Агар воқеа айнан шундай талқин қилинса, ҳеч қандай қонун бузилиши юз бермаган бўлади», —деган бош санитар шифокор.
Украина Соғлиқни сақлаш вазирлигининг сўнгги маълумотларига кўра, мамлакатда 25,4 минг кишида коронавирус аниқланган, 747 киши касаллик оқибатида вафот этган. Сўнгги бир суткада мамлакатда 588 та янги касалланиш ҳолати қайд этилган.
Изоҳ (0)