Латвияда коронавирус эпидемияси сабаб жорий қилинган фавқулодда ҳолат режими 9 июндан ўз кучини йўқотади. Бу ҳақда мамлакат бош вазири Кришьянис Кариниш ҳукуматнинг навбатдан ташқари мажлисида маълум қилди, дея хабар берган Delfi нашри.
Латвия соғлиқни сақлаш вазири Илзе Винькеле матбуот анжуманида 10 июндан бошлаб битта бинода 100 нафаргача, кўчадаги битта тадбирда эса 300 нафаргача одам тўпланишига рухсат берилишини билдирди.
Ҳозирда бинода ҳам, кўчада ҳам кўпи билан 25 нафар одамнинг тўпланишига рухсат этилади. Коронавирус юқтириб олганлар сони кескин кўпаймаса, чегараларнинг очилиши яна эпидемия бошланишига олиб келмаса, июлда минг нафаргача иштирокчи қатнашиши мумкин бўлган тадбирларнинг ўтказилишига рухсат берилади.
Кейинги босқич бино ичида 250 нафаргача одамни тўплаб, тадбир ўтказиш имкониятининг берилиши бўлиши мумкин. Вазирнинг сўзларига кўра, катта тадбирларнинг ўтказилишига қўйилган тақиқларнинг олиниши, қўлларни мажбурий тартибда дезинфекциялаш ҳамда ижтимоий масофа сақлаш қоидаларига амал қилиш шарт эмаслигини англатмайди. Вазир тадбирларга тиббий ниқоб таққан ҳолда боришга чақирган.
Латвия ҳукуматида карантин чекловларини кафе ва ресторанларга нисбатан юмшатиш муҳокама қилинмоқда. Июнь ойи давомида ташқи айвонли умумий овқатланиш масканлари қайта очилиши ва уларда биттадан кўп одамнинг бир стол атрофида ўтиришига, столларни эса ижтимоий масофаланиш қоидасига мос ҳолда жойлаштирилишига рухсат берилиши кутилмоқда.
Винкеленинг айтишича, бинолар ичида бир нафар одамга 4 квадрат метр майдон тўғри келиши ҳақидаги қоидага риоя қилиш зарур.
Эслатиб ўтамиз, Латвия, Литва ва Эстония давлатлари 15 майдан ички чегараларни очган.
Изоҳ (0)