Миннеаполисдан полиция томонидан қўлга олинганидан сўнг вафот этган афро-америкалик Жорж Флойд билан видолашув маросими бўлиб ўтди. Маросим ABC телеканали орқали тўғридан-тўғри трансляция қилинди.
Видолашув маросимида АҚШдаги қора танли аҳолининг ҳуқуқларини ҳимоя қилиш билан шуғулланувчи таниқли инсонлардан бири руҳоний Альфред Шарптон нутқ сўзлади. Шарптон аввалроқ АҚШ президенти Дональд Трамп қўлида Библия билан суратга тушганини эслатиб ўтди. Ўшанда у Американи юксалтиришга ҳамда норозилик ва тартибсизликлар вақтида мамлакат хавфсизлигини таъминлашга ваъда берган.
«Мен ҳеч қачон кимдир Библияни бундай ушлаганини кўрган эмасман», — дейди Шарптон ва у Библиядан реквизит сифатида фойдаланиб бўлмаслигини таъкидлаган.
https://twitter.com/Darryl_Forges/status/1268638717553651713
Бундан ташқари, Шарптон Трампни Флойднинг ўлимидан ўзининг сиёсий манфаатлари йўлида фойдаланганликда айблади. Руҳонийнинг сўзларига кўра, марҳумнинг оиласи бунга йўл қўймайди.
«Барчангиз Американи буюк қилиш ҳақида гапирасизлар. Ким учун ва қачон буюк бўлади? Биз Американи барча учун буюк қиламиз», — дейди Шарптон.
Видолашув маросимида Жорж Флойднинг қариндошлари ва яқинлари, шунингдек, АҚШдаги қора танлилар ҳуқуқини ҳимоя қилувчи бошқа таниқли инсонлар, хусусан, Жесси Жексон, бир неча сенатор ва актёрлар иштирок этди.
Маросим вақтида иштирокчилар 8 дақиқа 46 сония сукут сақлади. Оқ танли полиция ходими Флойдни қўлга олиш вақтида унинг бўйнини тиззаси билан тахминан шунча вақт босиб турган.
Эслатиб ўтамиз, Миннеаполис шаҳри полицияси вакили 25 май куни 46 ёшли афро-америкалик Жорж Флойдни қўлга олиш чоғида уни тутиб, ерга ётқизган ва тиззаси билан бўйнини босган. Полициячи уни шу тариқа узоқ вақт ушлаб туриши Жорж Флойднинг ўлимига сабаб бўлган. Ҳолат акс этган видео ижтимоий тармоқларда тарқалгач, АҚШнинг турли ҳудудларида норозилик намойишлари бошланган. АҚШнинг 25 та шаҳрида оммавий норозиликлар сабаб комендантлик соати эълон қилинди. Дональд Трамп Оқ уй қаршисида содир бўлган норозилик намойиши вақтида ерости бункерига беркингани маълум бўлди.
Изоҳ (0)