АҚШнинг турли шаҳарларида, кўчаларда норозилик намойишлари ўтказаётганлар коронавирусга тест топшириши лозим, оммавий тўпланишлар COVID-19 тарқалишининг ошишига олиб келиши мумкин. Бу ҳақда мамлакат касалликлар назорати ва профилактикаси маркази (CDC) директори Роберт Редфилд маълум қилган. Бу ҳақда CNN хабар берди.
«Биринчи навбатда тинчлик йўли билан кўчаларда тўпланиб, турли намойишларда иштирок этаётган фуқароларга коронавирусга тест топшириш ҳақида жиддий ўйлаб кўришни тавсия қилган бўлардим», – деган CDC раҳбари.
«Афсуски, ушбу оммавий намойишлар инфекциянинг ёйилишига туртки бўлиши эҳтимоли баланд, шу сабабли ушбу хавфнинг олдини олиш ва эпидемия тарқалишини камайтириш учун ҳар бир иштирокчи 3, 5, 7 кунда текширувдан ўтиши зарур», – деган Редфилд.
АҚШнинг карантин идораси раҳбари норозилик намойишлари ўтказаётган одамлар орасида тиббий ниқоб тақиш бўйича тавсияларга амал қилмаётганлар кўплиги, шунингдек, чекловлар қисман юмшатилганидан кейин очилган пляжларда ижтимоий масофа сақлаш тартибига риоя қилинмаётгани ачинарли ҳолат эканини қайд этган.
«Одамларга қилинаётган мурожаатлар жавобсиз қолаётганидан, уларнинг тавсияларга амал қилмаётганидан хавотирдамиз», – деган Редфилд.
У америкаликларнинг тўпланиши ўта хавфли экани, бу коронавируснинг симптомларсиз ўтадиган турнинг тарқалиши эҳтимолини оширишини таъкидлади. Тиббий ниқоб тақиб юриш касаллик тарқалишини назорат қилишдаги ўта муҳим жиҳатлардан бири эканлигига урғу берди.
«Менимча биз ўрганиб қолган ижтимоий масофа сақлаш тартибини янада такомиллаштириш зарур, сабаби бу бизга октябрь, ноябрь ва декабрь ойларида яна керак бўлади», – дея таъкидлаган куз ва қишда мавсумий грипп туфайли COVID-19 билан боғлиқ вазият янада ёмонлашиши мумкинлигини тахмин қилган CDC директори.
4 июнь ҳолатига кўра, АҚШда коронавирус инфекциясини юқтириб олганлар сони 1,8 миллион нафардан ошиб кетган, 107 мингтадан кўпроқ ўлим ҳолатлари қайд этилган. Мамлакатдаги карантин чоралари март ойи ўрталаридан бери амалда эди ва аста-секин кўплаб штатларда чекловлар босқичма-босқич юмшатила бошлаган: дўконлар очилган, бизнесни қайта бошлашга рухсат берилган, пляжлар, парклар ва бошқа жамоат жойлари фаолиятини бошлаганди.
АҚШда коронавирус пандемияси давом этаётган бир вақтда Миннеаполис шаҳрида афро-америкалик Жорж Флойднинг полиция ҳибсга олган вақтда қийноққа солиниши ва касалхонада вафот этиши вазиятни янада оғирлаштирди. Дастлаб тинч йўл билан бошланган митинглар ортидан юз минглаб одамлар норозилик намойишларига чиқди ва вақти-вақти билан полициячилар ҳамда намойишчилар ўртасида кескин тўқнашувлар, биноларга ўт қўйиш, машиналарни ёқиш ҳолатлари учраб турибди.
Изоҳ (0)