Коронавирус тарқалиши бошланган Хитойнинг Ухань шаҳри касалхоналарида COVID-19’га чалинган сўнгги уч бемор даволаниб чиқди, деб ёзмоқда «РБК» шаҳар маъмурияти эълон қилган маълумотларга таяниб.
Хабарда айтилишича, 5 июнга ўтар кечаси Уханда ва Хубэй провинциясида коронавирусга чалиниш бўйича бирорта ҳолат қайд этилмаган. Касалхонадаги сўнгги уч кишига жавоб берилган, коронавирусга чалинган бошқа беморлар қолмаган.
Умумий ҳисобда эпидемия бошланганидан буён Хубэй провинциясида коронавирусга чалиниш бўйича 68 135 та ҳолат қайд этилган. Улардан 63 623 нафари соғайган, 4 512 нафари вафот этган.
Провинцияда аввалроқ инфекция ташувчилари билан мулоқотда бўлган 217 киши шифокорлар назоратида бўлиб турибди.
Шаҳар расмийлари 24 апрелда ҳам касалхоналарда коронавирусга чалинган бирорта бемор қолмаганини маълум қилганди. Бироқ орадан 2 ҳафта ўтиб, яна касалланиш ҳолати қайд этилган.
2 июнь куни Уханда маҳаллий аҳолини коронавирусни аниқлаш бўйича оммавий тестдан ўтказиш якунланган. Натижада вирусни белгисиз ташувчи 300 киши борлиги аниқланган.
5 июнь ҳолатига кўра, Хитойда коронавирус билан касалланиш бўйича 5 та ва касаллик белгисиз ўтаётган 3 та ҳолат қайд этилди. Беморларнинг 8 нафари соғайди, вафот этиш ҳолатлари қайд этилмади.
Умумий ҳисобда эса мамлакатда 83 027 киши коронавирусга чалинган. Беморларнинг 78 327 нафари соғайган, 4 634 нафари вафот этган. Касалхоналарда 66 нафар бемор қолмоқда.
Изоҳ (0)