Microsoft корпорацияси асосчиси Билл Гейтс коронавирусга қарши вакцина ниқоби остида одамларни оммавий чиплаштираётгани ҳақидаги айбловларга муносабат билдирди.
Пандемия бошланганидан буён миллиардер фитна назарияларининг қаҳрамонига айланган бўлиб, унда Гейтс бутун инсоният устидан мутлақ ҳокимиятга эришиш, одамларни тажриба қуёнларига ва қулларга айлантириш, уларни мустақиллик ва ирода эркинлигидан маҳрум қилиш учун вакцина тайёрлаётгани таъкидланган.
«Мен ҳеч қачон микрочип каби нарсалар билан шуғулланмаганман. Бунга раддия бериб ҳам бўлмайди, чунки бу жуда ғалати ва аҳмоқона», — дея унинг сўзларидан иқтибос келтирмоқда Business Insider.
BBC билан бўлган суҳбатда ҳам у бундай миш-мишлар ва илмий қарашларга зид фикрлар одамлар ўртасида адоват пайдо бўлишига олиб келишини айтиб ўтган.
«Охир-оқибат вакцинага эга бўлганимиздан кейин аҳолининг тахминан 80 фоизини эмлаб, оммавий иммунитет ҳосил қилишга эришишимиз керак бўлади. Аммо улар буни ёлғон ёки вакцинани зарарли деб ўйласалар ва эмланишдан бош тортсалар, касаллик инсониятни ўлдиришда давом этади. Шу сабабли бундай аҳмоқона ўй-фикрлар борлиги мени бироз ташвишга соляпти», — деган Гейтс.
Дунёдаги энг йирик хайрия жамғармаси ҳисобланган Билл Гейтс ва унинг рафиқаси Мелинда Гейтснинг фонди 4 июнь куни қашшоқ давлатларни вакцина билан таъминлаш мақсадида беш йил ичида Вакциналар ва иммунизация бўйича глобал альянс (GAVI)га 1,6 миллиард доллар йўналтиришини эълон қилди. Коронавирусга қарши вакцина яратилганда уни тарқатиш учун яна 100 миллион доллар ажратилади.Мавзуга доир:
- Буюк Британияда фитна назарияси тарафдорлари коронавирусдан сақланиш учун мобил алоқа минораларига ҳужум қилди
- Шимолий Осетияда коронавирус борлигига ишонмаган аҳоли мобил алоқа антеннасини ёқиб юборди
- Россияликларнинг тўртдан бир қисми коронавирусни ундан манфаатдор шахсларнинг уйдирмаси деб ҳисобламоқда
Изоҳ (0)