Ўзбекистонда 4 июнь 23:00 дан 5 июнь 23:00 гача 68 кишида коронавирус аниқланди.

Фото: Telegram / @ssvmatbuotkotibi

Янги касалланиш ҳолатлари

Коронавирус инфекцияси тасдиқланган 68 нафар беморнинг

  • 42 нафари карантин муассасаларидаги фуқаролар орасида;
  • 17 нафари аҳоли орасида;
  • 9 нафари халқаро юк ташувчи автомашина ҳайдовчиларида аниқланган.

Аҳоли орасида коронавирус қайд этилиши бир кун олдингига нисбатан 4 тага кўпайди.

Кун давомида Тошкент шаҳрида аҳоли орасида 9 та, Қашқадарёда 4 та, Тошкент вилоятида 2 та, Наманган ва Бухорода биттадан ҳолат қайд этилди. 1 майдан буён коронавирусдан холи ҳудуд бўлган Қашқадарёга коронавирус қайтди. Тошкент шаҳридаги «Ўрикзор» бозорида юк ташувчи бўлиб ишлаган ходим ва у билан яқин мулоқотда бўлган 3 нафар оила аъзосида коронавирус аниқланган.

Қашқадарёда қайд этилган илк коронавирус ҳолати ҳам Тошкент шаҳрида бўлиб қайтган 14 ёшли болада аниқланганди. Кейин эса касаллик у боланинг 4 оила аъзосига ҳам юққанди. Янги касалланиш ҳолатлари ҳам Чироқчи туманида қайд этилган. Беморлар яшаган қишлоқ тўлиқ карантинга олинган.

Коронавирусдан соғайиш ҳолатлари

5 июнь давомида 160 нафар фуқаро соғайди. Бу рекорд ҳисобланади. Шундан 140 нафари Тошкент шаҳридаги, 14 нафари Навоий вилоятидаги, 4 нафари Самарқанд вилоятидаги ҳам 2 нафари Андижон вилоятидаги тиббиёт муассасаларида соғайиб чиқди.

Маълумот ўрнида, ЖиззахСурхондарёФарғона ва Хоразм вилоятлари коронавирусдан холи ҳудуд бўлиб турибди. Андижон (1 нафар бемор) ва  Қорақалпоғистон (3 нафар бемор) коронавирусдан холи ҳудудга айланишга яқин турибди.

Сирдарё ва Тошкент вилоятларидаги беморлар эса Тошкент шаҳрида даволанмоқда. Энг кўп бемор ҳозир айнан Тошкент шаҳрида (542 киши) бўлиб, даволаниш кўрсаткичи 71 фоизни ташкил этмоқда. Даволанаётган беморлар сони (109 бемор) бўйича иккинчи ўриндаги Навоийда соғайиш кўрсаткичи 50 фоизни ташкил этиб турибди.

Ҳозирда касаллик қайд этилган жами 4007 нафар бемордан 3247 нафари соғайиб, даволаниш кўрсаткичи 81 фоизни ташкил этмоқда. Айни пайтда тиббиёт муассасаларида 744 нафар бемор даволанмоқда.

Аҳволи оғир беморлар

Ҳозирда даволанаётган 744 бемордан 12 нафарининг аҳволи оғир, 1 нафари эса ўта оғир аҳволда. Бир сутка ичида аҳволи оғир беморлар сони 3 нафарга кўпайди.

15 мартда эпидемия бошланганидан бери Ўзбекистонда 16 нафар бемор COVID-19 асоратлари оқибатида вафот этган. Коронавирусдан вафот этган охирги икки беморда ўлимидан бир кун олдин инфекция аниқланганди.

Карантиндагилар

Шу кунгача жами 433 114 нафар фуқаро карантинга олинган бўлиб, уларнинг 383 981 нафари карантиндан чиқарилган. Бир кун ичида карантинда олинган фуқаролар сони 3905 нафарга кўпайди.

Ҳозирда Ўзбекистонда уй карантинида 26 687 нафар, стационар карантинда эса 22 446 нафар фуқаро қолмоқда.