Самарқанд вилояти Каттақўрғон туманида Самарқанд давлат университетининг Каттақўрғон филиали ва Транспорт университетининг Каттақўрғон филиалини ташкил этиш режалаштирилмоқда. Бу Вазирлар Маҳкамасининг «Самарқанд вилоятида юқори малакали кадрлар тайёрлаш тизимини кенгайтириш ва янада такомиллаштириш чора-тадбирлари тўғрисида»ги қарори лойиҳаси кўзда тутилган.
Қарор лойиҳасига кўра, ҳар иккала филиал 2020/2021-ўқув йилидан ўз фаолиятини бошлаши режалаштирилмоқда.
СамДУнинг филиали фаолиятининг асосий йўналиши сифатида ҳудудда педагогика соҳа ва тармоқларининг ривожланиш истиқболлари ва устувор вазифалари, шунингдек, замонавий техника ҳамда технологияларнинг ривожланиш тенденцияларини ҳисобга олган ҳолда педагогика соҳаси бўйича тарбия ва ўқитиш усуллари, таълим жараёнида замонавий педагогик технологияларни қўллаш кўникмаларига эга профессионал олий маълумотли кадрларни тайёрлаш белгиланмоқда.
Транспорт университетининг филиали фаолиятининг асосий йўналишлари сифатида эса транспорт соҳаси эҳтиёжларидан келиб чиқиб, меҳнат бозоридаги рақобатбардош олий маълумотли мутахассислар ва илмий-педагогик кадрларни, шунингдек, оммавий касб мутахассисларини тайёрлаш, қайта тайёрлаш ва уларнинг малакасини ошириш кўрсатилган.
СамДУнинг филиали Олий ва ўрта махсус таълим вазирлиги тизимида фаолият юритади. Филиалга талабаларни қабул қилиш ҳар йили тасдиқланадиган республика олий таълим муассасаларига ўқишга қабул қилиш параметрларидан келиб чиққан ҳолда давлат буюртмаси ва тўлов-контракт асосида белгиланади;
Филиал Самарқанд вилоятининг Каттақўрғон, Нарпай, Пахтачи, Иштихон ва Нуробод туман (шаҳар)ларидаги умумтаълим мактаблари, ўрта махсус таълим муассасаларида тегишли фанлардан дарс машғулотларини олиб борувчи ўқитувчиларга доимий равишда илмий-услубий ёрдам кўрсатиб боради.
Транспорт университетининг филиали Транспорт вазирлиги тизимида фаолият юритади. Филиалга талабаларни қабул қилиш ҳар йили тасдиқланадиган республика олий таълим муассасаларига ўқишга қабул қилиш параметрларидан келиб чиққан ҳолда давлат буюртмаси ва тўлов-контракт асосида белгиланади.
Самарқанд вилояти ҳокимлиги, Ўзбекистон Республикаси Олий ва ўрта махсус таълим вазирлиги, Транспорт вазирлиги, Халқ таълими вазирлиги, Мактабгача таълим вазирлиги ва Соғлиқни сақлаш вазирлигининг қуйидаги таклифлари маъқулланади:
СамДУнинг филиалини Каттақўрғон шаҳри, Амир Темур кўчасида жойлашган собиқ Самарқанд давлат чет тиллар институти қошидаги 2-сон академик лицейи ҳамда Каттақўрғон тумани, Қўштепа қишлоғида жойлашган Каттақўрғон тумани агротадбиркорлик ва сервис касб-ҳунар коллежининг бино ва иншоотларида жойлаштириш режалаштирилмоқда.
Транспорт университетининг филиалини эса Каттақўрғон шаҳар, «Чинобод» МФЙ, Қозоқовул қўрғонида жойлашган Каттақўрғон транспорт касб-ҳунар коллежининг бино ва иншоотларида жойлаштириш кўзланмоқда.
Эслатиб ўтамиз, Тошкент транспорт университети Тошкент темир йўл муҳандислари институти, Тошкент автомобиль йўлларини лойиҳалаш, қуриш ва эксплуатацияси институти ва Тошкент давлат техника университетининг авиакосмик технологиялари факультети негизида ташкил қилинган.
Изоҳ (0)