Президент Шавкат Мирзиёев Фарғона вилоятига ташрифи давомида Фарғона туманида ишга туширилган «Экокерама» масъулияти чекланган жамиятини бориб кўрди. Бу ҳақда Президент матбуот хизмати хабар берди.
Корхонага ташриф чоғида Президент Шавкат Мирзиёев мамлакат фойдали қазилмаларга бойлиги, лекин улар асосида тайёрланадиган материаллар катта миқдорда четдан келтирилаётганига эътибор қаратди.
Мавзуга доир: Шавкат Мирзиёев Тошлоқдаги «Global G.A.P» халқаро сертификатига эга корхонага ташриф буюрди (фото)
«Шунча имконият бўла туриб, биз кимни боқяпмиз? Халқимизни боқсак бўлмайдими? Мамлакатимизнинг ҳар бир қарич ери, ҳар бир бойлиги аҳоли жон бошига даромадни кўпайтиришга хизмат қилиши керак» — деди Президент.
Маълум қилинишича, «Экокерама» йилига 500 минг дона 20 турдаги сантехника маҳсулоти ишлаб чиқариш қувватига эга. Яъни импортнинг аксарият қисми ўрнини тўлдиради. Бундан ташқари, минтақа давлатларида 50 миллион долларлик бозор бор. Корхона қувватини ошириб, маҳсулотларнинг 60 фоизини экспортга йўналтириш режалаштирилган. 100 фоиз маҳаллий хом ашёдан фойдаланилиши ҳамда энергия тежовчи технологиялар қўлланилиши сабабли «Экокерама» маҳсулотлари хорижий муқобилларига нисбатан арзон бўлади.
Корхонанинг лойиҳа қиймати 15 миллион доллар. Жумладан, 11 миллион доллар тўғридан-тўғри инвестиция жалб этилган. Ҳозирда 500 киши иш билан таъминланиб, тест режимида дастлабки буюмлар тайёрланган.
Мавзуга доир: Шавкат Мирзиёев Фарғона интенсив боғдаги дарахт қаторлари орасига саримсоқпиёз ва дуккакли экинлар экиш бўйича кўрсатма берди
Давлат раҳбари бу корхонани кластерга айлантириш, карьерлар ажратиб бериб, камида 30 йиллик хом ашё захираси билан таъминлаш зарурлигини таъкидлади. Корхонага маҳсулотларини сотишда кўмаклашиш, хусусан, қурилиш материаллари бозорларида дўконларини ташкил этиш, давлат томонидан қурилаётган объектларда бу сантехника буюмларидан фойдаланиш бўйича кўрсатмалар берди. Ўз навбатида, компания раҳбариятига маҳсулотлар номенклатурасини кенгайтириш, бошқа вилоятларда ҳам шундай корхоналар очиб, янада кўп ёшларни иш билан таъминлаш тавсия қилинди.
Шу ерда Фарғона вилоятида амалга ошириладиган инвестиция лойиҳалари тақдимоти ўтказилди. Хусусан, енгил саноатдаги лойиҳалар туфайли пахта толасини қайта ишлаш ҳажми кескин ошади. Жорий йил якунида калава ип қайта ишлаш даражаси 56 фоизга, келгуси йили 71 фоизга етади. Илгари вилоятда жами 80 миллион долларлик пахта толаси оддий хом ашё сифатида сотилган бўлса, бу йил қарийб 314 миллион долларлик тайёр маҳсулот экспорт қилинади. Бу кўрсаткични 2021 йилда 540 миллионга, келгусида 1 миллиард долларга етказиш режалаштирилган.
Изоҳ (0)