Samarqand viloyati Kattaqo‘rg‘on tumanida Samarqand davlat universitetining Kattaqo‘rg‘on filiali va Transport universitetining Kattaqo‘rg‘on filialini tashkil etish rejalashtirilmoqda. Bu Vazirlar Mahkamasining “Samarqand viloyatida yuqori malakali kadrlar tayyorlash tizimini kengaytirish va yanada takomillashtirish chora-tadbirlari to‘g‘risida”gi qarori loyihasi ko‘zda tutilgan.
Qaror loyihasiga ko‘ra, har ikkala filial 2020/2021-o‘quv yilidan o‘z faoliyatini boshlashi rejalashtirilmoqda.
SamDUning filiali faoliyatining asosiy yo‘nalishi sifatida hududda pedagogika soha va tarmoqlarining rivojlanish istiqbollari va ustuvor vazifalari, shuningdek, zamonaviy texnika hamda texnologiyalarning rivojlanish tendensiyalarini hisobga olgan holda pedagogika sohasi bo‘yicha tarbiya va o‘qitish usullari, ta’lim jarayonida zamonaviy pedagogik texnologiyalarni qo‘llash ko‘nikmalariga ega professional oliy ma’lumotli kadrlarni tayyorlash belgilanmoqda.
Transport universitetining filiali faoliyatining asosiy yo‘nalishlari sifatida esa transport sohasi ehtiyojlaridan kelib chiqib, mehnat bozoridagi raqobatbardosh oliy ma’lumotli mutaxassislar va ilmiy-pedagogik kadrlarni, shuningdek, ommaviy kasb mutaxassislarini tayyorlash, qayta tayyorlash va ularning malakasini oshirish ko‘rsatilgan.
SamDUning filiali Oliy va o‘rta maxsus ta’lim vazirligi tizimida faoliyat yuritadi. Filialga talabalarni qabul qilish har yili tasdiqlanadigan respublika oliy ta’lim muassasalariga o‘qishga qabul qilish parametrlaridan kelib chiqqan holda davlat buyurtmasi va to‘lov-kontrakt asosida belgilanadi;
Filial Samarqand viloyatining Kattaqo‘rg‘on, Narpay, Paxtachi, Ishtixon va Nurobod tuman (shahar)laridagi umumta’lim maktablari, o‘rta maxsus ta’lim muassasalarida tegishli fanlardan dars mashg‘ulotlarini olib boruvchi o‘qituvchilarga doimiy ravishda ilmiy-uslubiy yordam ko‘rsatib boradi.
Transport universitetining filiali Transport vazirligi tizimida faoliyat yuritadi. Filialga talabalarni qabul qilish har yili tasdiqlanadigan respublika oliy ta’lim muassasalariga o‘qishga qabul qilish parametrlaridan kelib chiqqan holda davlat buyurtmasi va to‘lov-kontrakt asosida belgilanadi.
Samarqand viloyati hokimligi, O‘zbekiston Respublikasi Oliy va o‘rta maxsus ta’lim vazirligi, Transport vazirligi, Xalq ta’limi vazirligi, Maktabgacha ta’lim vazirligi va Sog‘liqni saqlash vazirligining quyidagi takliflari ma’qullanadi:
SamDUning filialini Kattaqo‘rg‘on shahri, Amir Temur ko‘chasida joylashgan sobiq Samarqand davlat chet tillar instituti qoshidagi 2-son akademik litseyi hamda Kattaqo‘rg‘on tumani, Qo‘shtepa qishlog‘ida joylashgan Kattaqo‘rg‘on tumani agrotadbirkorlik va servis kasb-hunar kollejining bino va inshootlarida joylashtirish rejalashtirilmoqda.
Transport universitetining filialini esa Kattaqo‘rg‘on shahar, “Chinobod” MFY, Qozoqovul qo‘rg‘onida joylashgan Kattaqo‘rg‘on transport kasb-hunar kollejining bino va inshootlarida joylashtirish ko‘zlanmoqda.
Eslatib o‘tamiz, Toshkent transport universiteti Toshkent temiryo‘l muhandislari instituti, Toshkent avtomobil yo‘llarini loyihalash, qurish va ekspluatatsiyasi instituti va Toshkent davlat texnika universitetining aviakosmik texnologiyalari fakulteti negizida tashkil qilingan.
Izoh (0)