АОКА штабида ўтказилган брифингда Мактабгача таълим вазирлиги матбуот котиби Дилафрўз Икромова давлатга қарашли мактабгача таълим муассасаларининг кечроқ очилаётганининг сабаби ва ушбу боғчаларнинг қачондан иш бошлаши мумкинлиги ҳақида маълумот берди.
«Республика махсус комиссиясининг қарорига кўра, 15 июндан бошлаб, «яшил» ва «сариқ» ҳудудларда мактабгача таълим муассасалари фаолиятига рухсат берилади.
Ҳозирда Мактабгача таълим вазирлиги Санитария-эпидемиологик осойишталик агентлиги, ЖССТ ва бошқа халқаро ташкилотлар вакилларидан иборат ишчи гуруҳ билан МТТлар фаолиятини тиклаш борасида қўйиладиган талаблар тартиби тўғрисида низом ишлаб чиқмоқда.
МТТлар фаолияти хавфсизлигини таъминлаш мақсадида барча шароитларни яратиш, жумладан, тарбияланувчиларнинг овқатланишини ташкил этиш учун озиқ-овқатлар, ҳимоя воситаларини сотиб олиш, ўрнатиш ва дезинфекция қилиш ишлари, шунингдек, МТТ ходимларини меҳнат таътилидан чақириш бўйича ҳужжатлар расмийлаштирилмоқда.
Зарур хавфсизлик чораларини таъминлаб берувчи хусусий МТТлари 2020 йил 15 июндан фаолиятини бошлаши мумкин.
Мактабгача таълим вазирлиги барча ҳолатларни инобатга олиб, давлат МТТлари фаолиятини хавфсиз ва сифатли ташкил этишга қаратилган дастур асосида 15 июндан 1 июлгача йўлга қўяди. Шу боис вазиятни тўғри баҳолашингизни сўраймиз», – деган Дилафрўз Икромова.
Эслатиб ўтамиз, Ўзбекистонда 1 июндан «сариқ» ва «яшил» ҳудудларда спорт тўгараклари, фитнес клублар ва спорт заллари фаолиятига рухсат берилган, 2020 йил 4 июнь куни 5 июндан масжидлар, 15 июндан ресторан ва боғчалар очилиши ҳақида республика махсус комиссиясининг қарори қабул қилинган.
Изоҳ (0)