Канада коронавирусга қарши курашда Ўзбекистонни қўллаб-қувватлаш учун 250 минг Канада доллари ажратди. Бу ҳақда Ўзбекистон Ташқи ишлар вазирлиги маълум қилди.
Хабар берилишича, 2020 йил 4 июнь куни Ўзбекистон ташқи ишлар вазири Абдулазиз Комилов ва Канада ташқи ишлар вазири Франсуа-Филипп Шампань ўртасида телефон орқали суҳбат бўлиб ўтди.
Мулоқот чоғида ташқи сиёсат идоралари раҳбарлари томонидан савдо-иқтисодий ва инвестицион ҳамкорликни ривожлантириш масалаларига алоҳида эътибор қаратилди. Канада бизнесининг Ўзбекистон бозорига фаол кириши ва қайта тикланадиган энергия, саноат ва қишлоқ хўжалиги соҳаларида юқори технологияли инвестиция лойиҳаларини амалга оширишдан манфаатдорлик изҳор этилди.
Икки мамлакат ўртасидаги алоқаларнинг ажралмас таркибий қисми халқаро ташкилотлар доирасидаги ҳамкорлик экани таъкидланди. Томонлар БМТ ва унинг ихтисослашган институтлари доирасидаги ҳамкорликни кенгайтиришга келишиб олди.
Франсуа-Филипп Шампань Ўзбекистоннинг Марказий Осиёдаги роли ва ўрнини қайд этар экан, мамлакатнинг халқаро майдондаги ташаббусларини амалга оширишда ҳар томонлама қўллаб-қувватлашга тайёрлигини билдирди.
Шунингдек, вазирлар Афғонистон масалалари юзасидан фикр алмашди. Томонлар Афғонистондаги вазиятни тинч йўналишга тезроқ ўтиши, мамлакатни Марказий Осиёдаги савдо-иқтисодий ва инфратузилма жараёнларига жалб қилиш зарурлигини таъкидлади.
Суҳбат чоғида COVID-19 тарқалиши билан боғлиқ дунёдаги мавжуд вазият кўриб чиқилди. Пандемиянинг салбий таъсирини камайтириш учун биргаликда ҳаракат қилиш муҳимлиги қайд этилди. Шу ўринда Канада ТИВ раҳбари Ўзбекистонда коронавирус инфекциясига қарши кураш учун 250 минг Канада доллари ажратилишини маълум қилди.
БМТ Тараққиёт дастурининг Ўзбекистондаги ваколатхонаси томонидан «Дарё»га маълум қилинишича, мазкур маблағ Канаданинг Маҳаллий ташаббусларни қўллаб-қувватлаш жамғармаси томонидан ажратилган ва Ўзбекистоннинг икки минтақаси — Сирдарё ва Қорақалпоғистонда иқтисодий имкониятларни ва тоза сувдан фойдаланиш шароитларини яхшилашга қаратилган.
Таклиф этилаётган молиявий ёрдам Сирдарё вилоятида аёллар раҳбарлигидаги қишлоқ уй хўжаликларининг аъзолари учун иш билан таъминлаш имкониятларини кенгайтириш ҳамда Қорақалпоғистонда тоза сувдан ва хавфсиз дезинфекция воситаларидан фойдаланиш имкониятларини яхшилаш орқали Ўзбекистоннинг қишлоқ ҳудудларида COVID-19 пандемиясига чидамлиликни оширишга кўмак беради.
Ушбу молиялаштириш бошқа донорлардан олинаётган маблағлар билан биргаликда Ўзбекистонда COVID-19 пандемияси оқибатларини бартараф этиш мақсадида яратилган БМТ Тараққиёт дастурининг Тезкор жавоб чоралари механизми томонидан ишлатилади.
Аввалроқ Япония ҳукумати БМТ Тараққиёт дастурининг Ўзбекистондаги COVID-19 пандемияси ижтимоий-иқтисодий оқибатларини бартараф этишдаги фаолиятини кенгайтириш учун 1,9 миллион доллар ажратиши ҳақида хабар берилганди.
Изоҳ (0)