Buyuk Britaniyada fitna nazariyasi tarafdorlari koronavirusdan saqlanish uchun mobil aloqa minoralariga hujum qildi

Buyuk Britaniyada izolyatsiya rejimi vaqtida kamida 90 ta mobil aloqa minorasiga hujum uyushtirilgan. Bu haqda MobileUK mobil aloqa operatorlari assotsiatsiyasiga tayanib, The Mirror xabar berdi.

Ta’kidlanishicha, fitna nazariyasining mahalliy tarafdorlari 5G aloqa minoralarini ishdan chiqarishga harakat qilgan. Ularning fikricha, bu minoralar koronavirus tarqalishiga xizmat qiladi. Bunda zarar ko‘rgan minoralarning bir qismigina 5G standarti signalini tarqatgan.

MobileUK’ning ma’lum qilishicha, ijtimoiy tarmoqlarda telekommunikatsion tarmoqlarning COVID-19’ga ta’siri haqidagi yolg‘on ma’lumotlar tarqalgan. “5G haqida tarqalayotgan nazariyalar hech qanday ilmiy asosga ega emas va ishonchli ilmiy nazariyaga asoslanmagan”, — deyiladi assotsiatsiya xabarida.

Shuningdek, tashkilot tomonidan bildirilishicha, aloqa minoralarining zararlanishi koronavirusni to‘xtatmaydi, biroq yordam so‘rab tezkorlik bilan murojaat qilmoqchi bo‘lgan kishilar salomatligi uchun qo‘shimcha xavflarni yuzaga keltirishi mumkin.