Сўх тумани Ички ишлар бўлимига янги раҳбар тайинланди. Бу ҳақда туман ҳокимлиги матбуот хизматига таяниб, «Xabar.uz» маълум қилди.
Фото: «Xabar.uz»
3 июнь куни бўлиб ўтган Халқ депутатлари Сўх тумани кенгашининг навбатдан ташқари олтинчи сессиясида Қосимжон Раҳимбердиев Сўх туман Ички ишлар бўлими бошлиғи этиб тайинланди.
Таъкидланишича, туман ИИБнинг янги раҳбари Сўх туманида туғилган.
Эслатиб ўтамиз, 2019 йилдан буён Сўх тумани Ички ишлар бўлими бошлиғи вазифасида ишлаб келаётган Сайидбаҳром Сайидмусаев Сўх тумани ҳокими этиб тайинланган эди.
Мавзуга доир: «Шуҳрат Ғаниев ва бошқа раҳбарлар етиб келиб, вазиятнинг чуқурлашишига йўл қўймаган» — Абдулла Арипов Сўхдаги можаро ҳақида
Маълумот учун, 31 май куни Ўзбекистоннинг Сўх тумани Чашма қишлоғи ва Қирғизистоннинг Қадамжой тумани Чечме қишлоғи аҳоли ўртасида Қирғизистон ҳудудида жойлашган, сувидан Ўзбекистон ҳам фойдаланадиган Чашма булоғи устида баҳс чиқиб, катта можарога айланиб кетган. Сўх тумани ҳокимлиги маълумотларига кўра, ҳодиса оқибатида 187 нафар ўзбекистонлик тан жароҳати олган, Ўзбекистон ҳудудидаги учта хонадонда ёнғин чиққан. Қирғизистоннинг Боткен вилоятида уй ва омборхона ёниб кетган.
Ушбу ҳолат юзасидан 1 июнь куни Ўзбекистон бош вазири Абдулла Арипов Ўзбекистон—Қирғизистон чегарасида қўшни мамлакат ҳукумати раҳбари билан учрашди. Бундан ташқари, Президент Шавкат Мирзиёев Қирғизистон президенти Сўронбай Жээнбеков билан телефон орқали мулоқот қилди.
