Ўзбекистонда 3 июнь соат 23:00 дан 4 июнь соат 23:00 гача 96 кишида коронавирус аниқланди.
Фото: Telegram / @ssvmatbuotkotibi
Янги касалланиш ҳолатлари
Янги ҳолатларнинг 81 таси карантин муассасаларидаги фуқаролар орасида қайд этилди. 13 таси аҳоли орасида, 2 таси халқаро юк ташувчи автомашина ҳайдовчиларида аниқланган.
Навоийда касалланган беморлар бир кунда 35 нафарга кўпайди. Қорақалпоғистонда 29 майдан бери биринчи марта янги ҳолат қайд этилди. Ўшанда ҳам, 4 июнда ҳам халқаро юк ташувчи машина ҳайдовчисида коронавирус аниқланган.
Аҳоли орасида қайд этилган ҳолатларнинг 8 таси Навоийда, 4 таси Тошкент шаҳрида ва 1 таси Тошкент вилоятида қайд этилган. Бир кун аввал аҳоли орасида фақат битта ҳолат қайд этилганди.
Мавзуга доир: Ўзбекистондаги яна 5 та туман «қизил» ҳудудга айланди. Улар орасида Сардоба ҳам бор (рўйхат)
Коронавирусдан соғайиш ҳолатлари
4 июнь давомида 73 нафар фуқаро соғайди. Шундан 64 нафари Тошкент шаҳридаги, 4 нафари Қорақалпоғистон Республикасидаги ҳамда 5 нафари Самарқанд вилоятидаги тиббиёт муассасаларидан соғайиб чиқди.
Маълумот ўрнида, Жиззах, Қашқадарё, Сурхондарё, Фарғона ва Хоразм вилоятлари коронавирусдан холи ҳудуд бўлиб турибди. Андижон (3 нафар бемор), Қорақалпоғистон (3 нафар бемор) ва Наманган (5 нафар бемор) ҳам коронавирусдан холи ҳудудга айланишга яқин турибди.
Сирдарё ва Тошкент вилоятларидаги беморлар эса Тошкент шаҳрида даволанмоқда. Энг кўп бемор ҳозир айнан Тошкент шаҳрида (640 киши) бўлиб, даволаниш кўрсаткичи 66 фоизни ташкил этмоқда. Беморлар сони бир кун ичида кескин ошган Навоийда 118 киши даволанмоқда ва соғайиш кўрсаткичи бир кун олдинги 54 фоиздан 45 фоизга тушиб кетди.
Ҳозирда касаллик қайд этилган жами 3939 нафар бемордан 3087 нафари соғайиб, даволаниш кўрсаткичи 78 фоизни ташкил этмоқда. Айни пайтда тиббиёт муассасаларида 836 нафар бемор даволанмоқда.
Аҳволи оғир беморлар
ССВ матбуот хизмати раҳбарининг Telegram каналидаги ахборотга кўра, айни вақтда 9 нафар оғир, 1 нафар ўта оғир аҳволдаги бемор бор. Бир сутка ичида оғир ва ўта оғир аҳволдаги беморлар сони бир нафардан камайган.
15 мартда эпидемия бошланганидан бери Ўзбекистонда 16 нафар бемор COVID-19 асоратлари оқибатида вафот этган.
Карантиндагилар
Шу кунгача жами 429 209 нафар фуқаро карантинга олинган бўлиб, уларнинг 380 843 нафари карантиндан чиқарилган.
Ҳозирда Ўзбекистонда уй карантинида 26 567 нафар, стационар карантинда эса 21 799 нафар фуқаро тиббий кузатувда бўлиб турибди.
