Ходимларини Тошкент шаҳрида доимий рўйхатга қўйиш учун раҳбарлари илтимоснома тақдим этиши мумкин бўлган ташкилотлар сони яна бештага кўпайди. Бу ҳақда Адлия вазирлиги хабар берди.
Маълум қилинишича, ҳукуматнинг айрим қарорларига киритилган ўзгартиришларга кўра, раҳбарлари ходимларни Тошкент шаҳри ва Тошкент вилоятида доимий прописка қилиш тўғрисида илтимоснома киритиши мумкин бўлган давлат ҳокимияти органлари, давлат ва хўжалик бошқаруви органлари, республика аҳамиятига молик бошқа давлат ташкилотлари рўйхатига қуйидагилар киритилди:
- Энергетика вазирлиги;
- «Ўзтрансгаз» АЖ;
- «Ҳудудгазтаъминот» АЖ;
- «Иссиқлик электр станциялари» АЖ;
- «Ҳудудий электр тармоқлари» АЖ.
Мазкур қонунга кўра, Тошкентда жойлашган давлат ташкилотларида 5 йил муддат мобайнида узлуксиз меҳнат фаолиятини юритаётган мутахассислар мазкур ҳудудларда доимий яшаш жойи бўйича рўйхатга олинади.
Вазирлар Маҳкамасининг «Ўзбекистон Республикасида доимий ва вақтинча прописка қилиш тартибини янада соддалаштириш чора-тадбирлари тўғрисида»ги қарорига 2020 йил 22 май куни ўзгартириш ва қўшимчалар киритилди. Қарорга кўра, прописка қилиш тартибига оид амалдаги низом 2020 йил 1 сентябрга қадар амал қилади. Ҳукуматнинг мазкур қарори билан Ўзбекистон фуқароларини Тошкент шаҳри ва Тошкент вилоятида доимий яшаш ва вақтинча турган жойи бўйича рўйхатга олиш тартиби тўғрисида низом тасдиқланди. Янги низом 2020 йил 1 сентябрдан кучга киради.
Шунингдек, Президент томонидан 20 майда имзоланган «‘Давлат божи тўғрисида’ги қонунга ўзгартиш ва қўшимчалар киритиш ҳақида»ги қонунга мувофиқ, Ўзбекистонда доимий яшовчи ва республиканинг бошқа минтақаларида доимий пропискага эга бўлган Ўзбекистон фуқаролари томонидан Тошкент шаҳри ва Тошкент вилоятида янги қурилган кўчмас мулк сотиб олинганда мол-мулкнинг олди-сотди шартномаларини тасдиқлаганлик учун шартнома суммасининг 5 фоиз миқдордаги давлат божининг алоҳида ставкаси бекор қилинди.
Изоҳ (0)