Япония ҳукумати БМТ Тараққиёт дастурининг Ўзбекистондаги COVID-19 пандемияси ижтимоий-иқтисодий оқибатларини бартараф этишдаги фаолиятини кенгайтириш учун 1,9 миллион доллар ажратади. Бу ҳақда БМТ Тараққиёт дастури матбуот хизматига таяниб, «Gazeta.uz» хабар берди.
«Мазкур маблағлар катализатор бўлади ва Ўзбекистонда COVID-19 оқибатларини юмшатиш, шунингдек, барқарор ва ҳар томонлама ривожланиш учун шароит яратишга йўналтирилади», — дейилади хабарда.
Бирлашган Миллатлар Ташкилоти Тараққиёт дастурининг мамлакатдаги фаолияти, асосан, ижтимоий-иқтисодий қийинчиликларни бошидан кечираётган ва алоҳида эътибор талаб қиладиган гуруҳларга қаратилган. Булар қаторига аёллар, норасмий сектордаги ёшлар, ишсизлар, хориждан қайтаётган муҳожирлар, мавжуд микро, кичик ва ўрта корхоналар ҳамда стартаплар киради.
БМТ Тараққиёт дастури Ўзбекистон ҳукумати томонидан Маҳалла ва оилани қўллаб-қувватлаш вазирлигининг 9600 та филиалини электрон ҳужжат айланиш тизимига ўтказиш бўйича саъй-ҳаракатларини қўллаб-қувватлайди.
Шунингдек, Япония томонидан молиялаштириладиган маблағлар ҳар йили мамлакатда БМТ Тараққиёт дастури томонидан ўтказиладиган стартап танловини ўтказиш учун ҳам ишлатилади. Унинг доирасида 40 нафар йигит-қиз ижтимоий инновациялар соҳасидаги ғояларини амалга ошириш учун маблағ олади.
Шунингдек, 990 та кичик ва ўрта корхона учун онлайн консалтинг хизматларини кўрсатиш режалаштирилган. 30 та кичик корхона ва олис туманларнинг 240 дан ортиқ фермерга хизмат кўрсатувчи 6 та кооператив молиявий ёрдам олади.
Бундан ташқари, аёлларни илм-фан, технология, муҳандислик ва математика (SТЕМ) билан шуғулланишга ундовчи ташаббусларни қўллаб-қувватлаш учун маблағлар ажратилади.
Аввалроқ Япония Ўзбекистондаги қишлоқ аёлларининг иқтисодий ҳуқуқлари ва имкониятларини кенгайтириш учун 3 миллион доллар ажратиши маълум қилинганди.
Изоҳ (0)