Андижон вилоятида 40 минг 724 та оилада яшовчи 158 минг 126 нафар фуқаро эҳтиёжманд сифатида рўйхатга олинган. Бу ҳақда Андижон давлат университетида эҳтиёжманд оилаларни камбағалликдан чиқаришга бағишланган семинарда маълум қилинди, дея хабар берди «Дарё» мухбири.
Таъкидланишича, Халқ депутатлари туман ва шаҳар кенгашлари томонидан ўтказилган хатловга кўра, Андижонда 158 минг 126 нафар фуқаро эҳтиёжманд оилаларда истиқомат қилади.
Маълумот берилишича, мазкур оилаларни ижтимоий муҳофаза қилиш сектор раҳбарлари зиммасига юклатилган.
Давлат раҳбарининг жорий йил 21—22 май кунлари вилоятга ташрифи чоғида берган топшириғи ижросини таъминлаш мақсадида семинарда 64 та сектор раҳбари иштирок этган. Семинарда давомида сектор раҳбарларига ўзларига бириктирилган ҳудудларда истиқомат қилаётган эҳтиёжманд оилаларни жорий йил охиригача камбағалликдан чиқариш бўйича назарий ҳамда амалий кўрсатмалар берилган.
30 соатга мўлжалланган машғулотларда Вазирлар Маҳкамаси мажмуалари раҳбарлари, вазир ўринбосарлари, вазирликлар бошқармалари бошлиқлари, Давлат бошқаруви академияси профессор-ўқитувчилари томонидан белгиланган муҳим вазифаларни амалда бажариш механизмлари, тартиблари хусусида аниқ мисоллар келтирилган.
Ўқув-семинар доирасида сектор раҳбарлари Андижон, Хонобод шаҳарлари, Булоқбоши, Избоскан, Шаҳрихон, Жалақудуқ туманларидаги қатор корхоналар, фермер хўжаликларида, шунингдек, аҳоли томорқасидан унумли фойдаланиш бўйича олиб борилаётган ишларни таҳлил қилиб, маҳорат машғулотлари ўтказган.
Изоҳ (0)