Олий Мажлис қонунчилик палатасининг депутати, «Юксалиш» умуммиллий ҳаракати раисининг ўринбосари Бобур Бекмуродов Россия ҳамда Қозоғистон чегарасида Ўзбекистонга қайта олмаётган фуқароларга бу борада кўмак бериш лозимлиги ҳақида фикр билдирди.
Депутатнинг ёзишича, кўплаб хорижий давлатларда карантин тартиби эълон қилингани сабабли оғир шароитда қолаётган ўзбекистонликларни олиб келиш ҳукуматнинг кун тартибидаги муҳим масалалардан бири бўлиб турибди, тўхтовсиз чартер рейсларни ташкил қилиш орқали минглаб фуқаролар олиб келинмоқда.
Шунингдек, у бир неча ҳафталардан буён юзлаб ўзбекистонликлар Россия ва Қозоғистон чегарасида қолаётгани, уларнинг қилаётган мурожаатлари кўрмаганликка олинаётганини ҳам танқид қилган.
«Албатта, бу фуқароларимиз элчихона орқали, аввало, ўз оилалари саломатлигини ҳурмат қилган ҳолда давлат томонидан ташкил қилинаётган расмий йўллар билан қайтиши керак эди. Аммо бу ижро ҳокимиятида мазкур масала бўйича кузатилаётган чорасизликни оқлай олмайди – ҳар қандай вазиятда ҳам Ўзбекистон фуқароларига ғамхўрлик кўрсатиш, уларнинг ҳаётий манфаатларини ҳимоя қилиш керак.
Ҳукумат таркибида хорижда вақтинчалик меҳнат фаолиятини амалга ошираётган Ўзбекистон Республикаси фуқаролари ҳуқуқини ҳимоя қилиш департаменти мавжуд. Мазкур тузилманинг қайтишга мажбур бўлган фуқароларни олиб келиш бўйича аниқ режаси борми? Улар бир неча ҳафтадан бери очиқ дала шароитида қолиб кетаётган ўзбекистонликларни қайтаришга тўғридан-тўғри масъул бўлган ташкилот сифатида қандай ечим таклиф қилади?
Қисқа муддатлар ичида биринчи навбатда эвакуацияга муҳтож бўлган фуқаролар рўйхатини шакллантириш ва уларни қайтариш бўйича аниқ режалар эълон қилиниши керак. Бундан ташқари, хорижда бўлиб турган ўзбекистонликларни давлат томонидан қўллаб-қувватлаш бўйича ёндашувлар ҳақида ҳам маълумот берилиши лозим.
Ўз навбатида, хориждаги ватандошлар ҳам ҳукуматнинг бу борадаги ҳаракатларини қўллаб-қувватлаши, чекланган имконият шароитида эътибор бирламчи эҳтиёжи бўлганларга берилишини тўғри тушуниши керак бўлади», – деб ёзган депутат.
Изоҳ (0)