Вазирлар Маҳкамасининг 2020 йил 28 майдаги «Кексаларни давлат томонидан қўллаб-қувватлаш тизимини янада такомиллаштиришнинг қўшимча чора-тадбирлари тўғрисида»ги 340-сон қарори билан I гуруҳ ногиронлиги бўлган кексалар учун бепул саёҳат уюштириш бўйича имтиёз жорий этилди.
«Кексаларни давлат томонидан қўллаб-қувватлаш тизимини янада такомиллаштириш бўйича чора-тадбирлар» дастурига мувофиқ, 1 ноябрдан 30 ноябргача «Кексалар учун туризм ойлиги» эълон қилинади.
Ойлик доирасида Туризмни ривожлантириш давлат қўмитаси туризм объектлари томонидан ихтиёрий тақдим қилинадиган чегирмалар ва акциялар тўғрисида ўз расмий веб-саҳифасида эълон қилиб боради, Транспорт вазирлиги, Uzbekistan Airways ва «Ўзбекистон темир йўллари» компаниялари билан биргаликда саёҳат қилувчилар учун чипталарга ихтиёрий чегирмаларни эълон қилади.
Бундан ташқари, Маданият вазирлиги ҳам маданий мерос объектларига кириш чипталарига чегирмалар эълон қилишни режалаштирмоқда.
Ўзбекистон бўйлаб «Саёҳат барча учун!» шиори остидаги хайрия лойиҳаси амалга оширилади. I гуруҳ ногиронлиги бўлган кексалар йилига бир марта бепул туристик саёҳат қилиш имконидан фойдалана олади. Маҳалла ва оилани қўллаб-қувватлаш вазирлигига 1 октябргача саёҳат қилувчилар рўйхатини шакллантириш вазифаси топширилган.
Саёҳат давомида саёҳатчиларни жойлаштириш, овқатланиш ва транспорт хизматлари учун маблағларнинг 50 фоизи хайрия лойиҳасининг махсус ҳисоб варағидан, қолган қисми «Нуроний» жамғармаси маблағлари эвазига қопланади.
Ҳукумат қарорида Қорақалпоғистон Республикаси Вазирлар кенгаши, вилоятлар ва Тошкент шаҳар ҳокимликларига ногиронлар ва ёлғиз пенсионерларга биринчи навбатда моддий ёрдам кўрсатиш бўйича таъсирчан назорат ўрнатиш, шу жумладан, пенсияларни тўлаш, ижтимоий ва тиббий таъминот хизматларини кўрсатиш вазифаси топширилган. Ўзгалар парваришига муҳтож ва ёлғиз кексаларнинг турар жойларини таъмирлаш учун маҳаллий бюджетдан маблағлар ажратилиши назарда тутилган.
Изоҳ (0)